Subscribe to our newsletter and get our newest updates

Zafar Iqbal

  • Ghazal


maine kab dawa kiya tha sar-ba-sar baqi hun main


maiñ ne kab da.avā kiyā thā sar-ba-sar baaqī huuñ maiñ
pesh-e-ḳhidmat hoñ tumhāre jis qadar baaqī huuñ maiñ

maiñ bahut sā jaise zaa.e.a ho chukā huuñ jā-ba-jā
haath se mahsūs kartā huuñ kidhar baaqī huuñ maiñ

DhūñDte haiñ ab jahāñ merā nishāñ tak bhī nahīñ
us taraf bhī dekh lenā thā jidhar baaqī huuñ maiñ

merī tafsīlāt meñ jaane kā mauqa.a ab kahāñ
ab to āsāñ hai samajhnā muḳhtasar baaqī huuñ maiñ

din chaḌhe honā na honā ek sā rah jā.egā
ye bhī kyā kam hai ki ab se raat bhar baaqī huuñ maiñ

ḳharch saarā ho chukā huuñ aur duniyā meñ kahīñ
kuchh agar huuñ bhī to ḳhud se be-ḳhabar baaqī huuñ maiñ

maiñ kisī kaam aa bhī saktā huuñ agar samjhe koī
aaj bhī ḳhas-ḳhāna-e-dil meñ sharar baaqī huuñ maiñ

maiñ agar baaqī nahīñ huuñ to bhī hai kis ko ġharaz
aur hai parvā yahāñ kis ko agar baaqī huuñ maiñ

kuchh bhī ho be-sūd hai mujh se safar karnā 'zafar'
jo kahīñ jaatī nahīñ vo rah-guzar baaqī huuñ maiñ

main ne kab dawa kiya tha sar-ba-sar baqi hun main
pesh-e-KHidmat hon tumhaare jis qadar baqi hun main

main bahut sa jaise zaea ho chuka hun ja-ba-ja
hath se mahsus karta hun kidhar baqi hun main

DhunDte hain ab jahan mera nishan tak bhi nahin
us taraf bhi dekh lena tha jidhar baqi hun main

meri tafsilat mein jaane ka mauqa ab kahan
ab to aasan hai samajhna muKHtasar baqi hun main

din chaDhe hona na hona ek sa rah jaega
ye bhi kya kam hai ki ab se raat bhar baqi hun main

KHarch sara ho chuka hun aur duniya mein kahin
kuchh agar hun bhi to KHud se be-KHabar baqi hun main

main kisi kaam aa bhi sakta hun agar samjhe koi
aaj bhi KHas-KHana-e-dil mein sharar baqi hun main

main agar baqi nahin hun to bhi hai kis ko gharaz
aur hai parwa yahan kis ko agar baqi hun main

kuchh bhi ho be-sud hai mujh se safar karna 'zafar'
jo kahin jati nahin wo rah-guzar baqi hun main

Videos
This video is playing from YouTube Videos
This video is playing from YouTube Zafar Iqbal

Leave a comment

+