hai mire pesh-e-nazar chāñd sī sūrat terī
gul khilā.egī kisī roz mohabbat terī

baar ulfat kā na uThtā kisī āshiq se magar
roz detī hai ilāhī ise qudrat terī

chashm-e-maqtūl ko dekhā to kahā qātil ne
jā.egī tā-ba-lahad saath ye hasrat terī

yās-o-armān-o-tamannā se na ghabrā āshiq
rah-e-ulfat meñ baḌhā.eñgī ye himmat terī

barkateñ kis ke qadam kī haiñ dil-e-zār batā
roz baḌhtī hī chalī jaatī hai vus.at terī

kis ne rokā hai tujhe kyuuñ nahīñ aatī hai qazā
roz ushshāq kiyā karte haiñ minnat terī

jā-ba-jā tere sabab se maiñ rukā jaatā huuñ
aaj dāman meñ kiye detā huuñ fursat terī

shaaq hai terī judā.ī dil-e-ġham-ghīñ mujh ko
le chalī sū-e-bayābāñ mujhe vahshat terī

kibr-o-naḳhvat hai ye kis chiiz pe batlā vo mujhe
ḳhaak hai terī binā kyā hai haqīqat terī

saikḌoñ jurm pe bhī rizq mujhe detā hai
ye ināyat ye mohabbat ye muravvat terī

haa.e afsos 'jamīla' ye huā haal tirā
ab to dekhī nahīñ jaatī hai musībat terī

hai mere pesh-e-nazar chand si surat teri
gul khilaegi kisi roz mohabbat teri

bar ulfat ka na uThta kisi aashiq se magar
roz deti hai ilahi ise qudrat teri

chashm-e-maqtul ko dekha to kaha qatil ne
jaegi ta-ba-lahad sath ye hasrat teri

yas-o-arman-o-tamanna se na ghabra aashiq
rah-e-ulfat mein baDhaengi ye himmat teri

barkaten kis ke qadam ki hain dil-e-zar bata
roz baDhti hi chali jati hai wusat teri

kis ne roka hai tujhe kyun nahin aati hai qaza
roz ushshaq kiya karte hain minnat teri

ja-ba-ja tere sabab se main ruka jata hun
aaj daman mein kiye deta hun fursat teri

shaq hai teri judai dil-e-gham-ghin mujh ko
le chali su-e-bayaban mujhe wahshat teri

kibr-o-naKHwat hai ye kis chiz pe batla wo mujhe
KHak hai teri bina kya hai haqiqat teri

saikDon jurm pe bhi rizq mujhe deta hai
ye inayat ye mohabbat ye murawwat teri

hae afsos 'jamila' ye hua haal tera
ab to dekhi nahin jati hai musibat teri