chhupā huā jo numūdār se nikal aayā
ye farq bhī tire inkār se nikal aayā

palaT paḌā jo maiñ sar phoḌ kar mohabbat meñ
to rāsta isī dīvār se nikal aayā

mujhe ḳharīdnā kuchh bhī na thā isī ḳhātir
maiñ ḳhud ko bech ke bāzār se nikal aayā

abhī to apne khañDar hī kī sair thī baaqī
ye tū kahāñ mire āsār se nikal aayā

bahut se aur tilismāt muntazir haiñ mire
agar kabhī tire asrār se nikal aayā

mujhe bhī de rahe the ḳhil.at-e-vafā lekin
nazar bachā ke maiñ darbār se nikal aayā

sire se jo kahīñ maujūd hī na thā āḳhir
vo naqs bhī mire kirdār se nikal aayā

na.ī fazā na.e āfāq haiñ usī ke liye
jo aaj uḌtī huī Daar se nikal aayā

usī ko ek ġhanīmat qarār dūñgā 'zafar'
jo ek sher bhī tūmār se nikal aayā

chhupa hua jo numudar se nikal aaya
ye farq bhi tere inkar se nikal aaya

palaT paDa jo main sar phoD kar mohabbat mein
to rasta isi diwar se nikal aaya

mujhe KHaridna kuchh bhi na tha isi KHatir
main KHud ko bech ke bazar se nikal aaya

abhi to apne khanDar hi ki sair thi baqi
ye tu kahan mere aasar se nikal aaya

bahut se aur tilismat muntazir hain mere
agar kabhi tere asrar se nikal aaya

mujhe bhi de rahe the KHilat-e-wafa lekin
nazar bacha ke main darbar se nikal aaya

sire se jo kahin maujud hi na tha aaKHir
wo naqs bhi mere kirdar se nikal aaya

nai faza nae aafaq hain usi ke liye
jo aaj uDti hui Dar se nikal aaya

usi ko ek ghanimat qarar dunga 'zafar'
jo ek sher bhi tumar se nikal aaya