Subscribe to our newsletter and get our newest updates

Jameel Yusuf

  • Ghazal


hua chali to nasha chha gaya fazaon mein


huā chalī to nasha chhā gayā fazāoñ meñ
ḳhayāl Duub gayā duur kī sadāoñ meñ

na haath aa.e mire dauḌte hue lamhe
safar kaTā hai mirā bādaloñ kī chhāñv meñ

meñ apne shahr ke naqsh-o-nigār bhuul gayā
kisī ne luuT liyā mujh ko chaaT gaañv meñ

na ishq kī koī manzil na husn kā koī taur
ye aag kaise giraftār ho vafāoñ meñ

ye fāsloñ ke sarāboñ se sair ho na sake
na jaane tishnagī kitnī hai mere paañv meñ

qadam qadam pe mujhe sajda-gah nazar aa.e
ghirā huā huuñ maiñ bandoñ meñ yā ḳhudāoñ meñ

ise bhī gāhe-ba-gāhe nigāh meñ rakhnā
'jamīl' bhī to hai tere ġhazal-sarāoñ meñ

hua chali to nasha chha gaya fazaon mein
KHayal Dub gaya dur ki sadaon mein

na hath aae mere dauDte hue lamhe
safar kaTa hai mera baadalon ki chhanw mein

mein apne shahr ke naqsh-o-nigar bhul gaya
kisi ne luT liya mujh ko chaT ganw mein

na ishq ki koi manzil na husn ka koi taur
ye aag kaise giraftar ho wafaon mein

ye faslon ke sarabon se sair ho na sake
na jaane tishnagi kitni hai mere panw mein

qadam qadam pe mujhe sajda-gah nazar aae
ghira hua hun main bandon mein ya KHudaon mein

ise bhi gahe-ba-gahe nigah mein rakhna
'jamil' bhi to hai tere ghazal-saraon mein


Source: Funoon(Jadeed Ghazal Number: Volume-002)

Leave a comment

+