Subscribe to our newsletter and get our newest updates

Jameel Mazhari

  • Ghazal


jo tum ho do qadam aage to hum hain do qadam pichhe


jo tum ho do qadam aage to ham haiñ do qadam pīchhe
ye farq-e-do-qadam kyā hai na tum aage na ham pīchhe

sanam us ke jamālī haiñ sanam us ke ḳhayālī haiñ
ḳhudā-sāzī thā shuġhl-e-dair rahtā kyuuñ haram pīchhe

ye kyā insāf hai aadil baḌhāyā tishnagī pahle
diyā terī adālat ne shu.ūr-e-shahad-o-sam pīchhe

ye hai tārīḳh kā darbār kuchh darvesh baiThe haiñ
khaḌe haiñ qaisar o faġhfūr o dārā-e-ajam pīchhe

bulandī shiddat-e-parvāz se bantī ga.ī yaanī
nazar aage thī aur har fāsla thā besh o kam pīchhe

yahāñ bhī kar ke ik sajda vahāñ bhī kar ke ik sajda
musāfir baḌh gayā chīḳhā kiye dair o haram pīchhe

gale us se bhī kaTte haiñ gale is se bhī kaTte haiñ
rahe kyuuñ 'maz.harī' talvār se apnā qalam pīchhe

jo tum ho do qadam aage to hum hain do qadam pichhe
ye farq-e-do-qadam kya hai na tum aage na hum pichhe

sanam us ke jamali hain sanam us ke KHayali hain
KHuda-sazi tha shughl-e-dair rahta kyun haram pichhe

ye kya insaf hai aadil baDhaya tishnagi pahle
diya teri adalat ne shuur-e-shahad-o-sam pichhe

ye hai tariKH ka darbar kuchh darwesh baiThe hain
khaDe hain qaisar o faghfur o dara-e-ajam pichhe

bulandi shiddat-e-parwaz se banti gai yani
nazar aage thi aur har fasla tha besh o kam pichhe

yahan bhi kar ke ek sajda wahan bhi kar ke ek sajda
musafir baDh gaya chiKHa kiye dair o haram pichhe

gale us se bhi kaTte hain gale is se bhi kaTte hain
rahe kyun 'mazhari' talwar se apna qalam pichhe


Leave a comment

+