hamārā to koī sahārā nahīñ hai
ḳhudā hai to lekin hamārā nahīñ hai

mohabbat kī talḳhī gavārā hai lekin
haqīqat kī talḳhī gavārā nahīñ hai

mirī zindagī vo ḳhalā hai ki jis meñ
kahīñ duur tak koī taarā nahīñ hai

ḳhudā kyā ḳhudī ko bhī āvāz dī hai
musībat meñ kis ko pukārā nahīñ hai

sarāb ik haqīqat hai aab ik tasavvur
yahī zindagī hai to chārā nahīñ hai

ham apnī hī āñkhoñ kā parda ulaT deñ
haqīqat ko ye bhī gavārā nahīñ hai

vo kyā un ke gesū sañvāregā jis ne
garebāñ bhī apnā sañvārā nahīñ hai

ḳhudā us se nipTe to nipTe ki ye dil
hamārā nahīñ hai tumhārā nahīñ hai

nazar un kī gosha-nashīñ hai hayā se
ishārā nahīñ ye ishārā nahīñ hai

hamārā hai kyā jab hamārā irāda
hamārā hai lekin hamārā nahīñ hai

garebāñ bahut se hue paara paara
naqāb ek bhī paara paarā nahīñ hai

kisī ke liye dil ko sulgā ke dekho
jahannam koī isti.ārā nahīñ hai

ba-juz 'maz.harī' ke sabhī bazm meñ haiñ
vahī tere va.adoñ kā maarā nahīñ hai

hamara to koi sahaara nahin hai
KHuda hai to lekin hamara nahin hai

mohabbat ki talKHi gawara hai lekin
haqiqat ki talKHi gawara nahin hai

meri zindagi wo KHala hai ki jis mein
kahin dur tak koi tara nahin hai

KHuda kya KHudi ko bhi aawaz di hai
musibat mein kis ko pukara nahin hai

sarab ek haqiqat hai aab ek tasawwur
yahi zindagi hai to chaara nahin hai

hum apni hi aankhon ka parda ulaT den
haqiqat ko ye bhi gawara nahin hai

wo kya un ke gesu sanwarega jis ne
gareban bhi apna sanwara nahin hai

KHuda us se nipTe to nipTe ki ye dil
hamara nahin hai tumhaara nahin hai

nazar un ki gosha-nashin hai haya se
ishaara nahin ye ishaara nahin hai

hamara hai kya jab hamara irada
hamara hai lekin hamara nahin hai

gareban bahut se hue para para
naqab ek bhi para para nahin hai

kisi ke liye dil ko sulga ke dekho
jahannam koi istiara nahin hai

ba-juz 'mazhari' ke sabhi bazm mein hain
wahi tere wadon ka mara nahin hai