surḳhi-e-shām ne yuuñ phuul bikhere dil meñ
jaise chupke se utar aa.e savere dil meñ

ham to sadiyoñ se yuuñ hī gosh bar-āvāz rahe
jaane vo kaun hai kyā raaz haiñ tere dil meñ

paas shab bhar koī ḳhurshīd-sifat rahtā hai
din to taare se utar aate haiñ mere dil meñ

pyaar kī lū se munavvar hai shabistān-e-visāl
aaj to aan mile shaam savere dil meñ

ham musāfir haiñ mohabbat kī kaThin rāhoñ ke
thak bhī jaate haiñ to karte haiñ basere dil meñ

kyuuñ bhaTaktā hai idhar aa ke zarā sustā le
is taraf dhuup hai bādal hai ghanere dil meñ

apnā sarmāya-e-fan phir bhī salāmat hī rahā
kitnī hī baar 'jamīl' aa.e luTere dil meñ

surKHi-e-sham ne yun phul bikhere dil mein
jaise chupke se utar aae sawere dil mein

hum to sadiyon se yun hi gosh bar-awaz rahe
jaane wo kaun hai kya raaz hain tere dil mein

pas shab bhar koi KHurshid-sifat rahta hai
din to tare se utar aate hain mere dil mein

pyar ki lu se munawwar hai shabistan-e-visal
aaj to aan mile sham sawere dil mein

hum musafir hain mohabbat ki kaThin rahon ke
thak bhi jate hain to karte hain basere dil mein

kyun bhaTakta hai idhar aa ke zara susta le
is taraf dhup hai baadal hai ghanere dil mein

apna sarmaya-e-fan phir bhi salamat hi raha
kitni hi bar 'jamil' aae luTere dil mein