nahīñ ki tere ishāre nahīñ samajhtā huuñ
samajh to letā huuñ saare nahīñ samajhtā huuñ

tirā chaḌhā huā dariyā samajh meñ aatā hai
tire ḳhamosh kināre nahīñ samajhtā huuñ

kidhar se niklā hai ye chāñd kuchh nahīñ ma.alūm
kahāñ ke haiñ ye sitāre nahīñ samajhtā huuñ

kahīñ kahīñ mujhe apnī ḳhabar nahīñ miltī
kahīñ kahīñ tire baare nahīñ samajhtā huuñ

jo daa.eñ baa.eñ bhī haiñ aur aage pīchhe bhī
unheñ maiñ ab bhī tumhāre nahīñ samajhtā huuñ

ḳhud apne dil se yahī iḳhtilāf hai merā
ki maiñ ġhamoñ ko ġhubāre nahīñ samajhtā huuñ

kabhī to hotā hai merī samajh se bāhar hī
kabhī maiñ sharm ke maare nahīñ samajhtā huuñ

kahīñ to haiñ jo mire ḳhvāb dekhte haiñ 'zafar'
koī to haiñ jinheñ pyāre nahīñ samajhtā huuñ

nahin ki tere ishaare nahin samajhta hun
samajh to leta hun sare nahin samajhta hun

tera chaDha hua dariya samajh mein aata hai
tere KHamosh kinare nahin samajhta hun

kidhar se nikla hai ye chand kuchh nahin malum
kahan ke hain ye sitare nahin samajhta hun

kahin kahin mujhe apni KHabar nahin milti
kahin kahin tere bare nahin samajhta hun

jo daen baen bhi hain aur aage pichhe bhi
unhen main ab bhi tumhaare nahin samajhta hun

KHud apne dil se yahi iKHtilaf hai mera
ki main ghamon ko ghubare nahin samajhta hun

kabhi to hota hai meri samajh se bahar hi
kabhi main sharm ke mare nahin samajhta hun

kahin to hain jo mere KHwab dekhte hain 'zafar'
koi to hain jinhen pyare nahin samajhta hun