Subscribe to our newsletter and get our newest updates

Zafar Iqbal

  • Ghazal


abhi kisi ke na mere kahe se guzrega


abhī kisī ke na mere kahe se guzregā
vo ḳhud hī ek din is dā.ere se guzregā

bharī rahe abhī āñkhoñ meñ us ke naam kī niind
vo ḳhvāb hai to yūñhī dekhne se guzregā

jo apne aap guzartā hai kūcha-e-dil se
mujhe gumāñ thā mire mashvare se guzregā

qarīb aane kī tamhīd ek ye bhī rahī
vo pahle pahle zarā fāsle se guzregā

qusūr-vār nahīñ phir bhī chhuptā phirtā huuñ
vo merā chor hai aur sāmne se guzregā

chhupī ho shāyad isī meñ salāmtī dil kī
ye rafta rafta agar TūTne se guzregā

hamārī sāda-dilī thī jo ham samajhte rahe
ki aks hai to isī ā.īne se guzregā

samajh hameñ bhī hai itnī ki us kā ahd-e-sitam
guzārnā hai to ab hausle se guzregā

galī galī mire zarre bikhar ga.e the 'zafar'
ḳhabar na thī ki vo kis rāste se guzregā

abhi kisi ke na mere kahe se guzrega
wo KHud hi ek din is daere se guzrega

bhari rahe abhi aankhon mein us ke nam ki nind
wo KHwab hai to yunhi dekhne se guzrega

jo apne aap guzarta hai kucha-e-dil se
mujhe guman tha mere mashware se guzrega

qarib aane ki tamhid ek ye bhi rahi
wo pahle pahle zara fasle se guzrega

qusur-war nahin phir bhi chhupta phirta hun
wo mera chor hai aur samne se guzrega

chhupi ho shayad isi mein salamti dil ki
ye rafta rafta agar TuTne se guzrega

hamari sada-dili thi jo hum samajhte rahe
ki aks hai to isi aaine se guzrega

samajh hamein bhi hai itni ki us ka ahd-e-sitam
guzarna hai to ab hausle se guzrega

gali gali mere zarre bikhar gae the 'zafar'
KHabar na thi ki wo kis raste se guzrega


Leave a comment

+