Warning: session_start(): open(/tmp/sess_4v2qsehe93ec0qlmpiq7e3vq62, O_RDWR) failed: No space left on device (28) in /razi/eraazi/darbari/chunmun/index.php on line 15
kahan hum aur kahan ab sharab-KHana-e-ishq

Subscribe to our newsletter and get our newest updates

Jaleel Manikpuri

  • Ghazal


kahan hum aur kahan ab sharab-KHana-e-ishq


kahāñ ham aur kahāñ ab sharāb-ḳhāna-e-ishq
na vo dimāġh na vo dil na vo zamāna-e-ishq

huā hai shahr-e-ḳhamoshāñ meñ jab guzar merā
sunā kiyā huuñ lab-e-gor se fasāna-e-ishq

ḳhayāl-e-ruḳh pe hai mauqūf dil kī ābādī
kabhī na gul ho ilāhī charāġh-e-ḳhāna-e-ishq

bhare hue haiñ hasīnān-e-sīm-tan dil meñ
ḳhudā kare kabhī ḳhālī na ho ḳhazāna-e-ishq

ga.ī dimāġh meñ jis ke kiyā asiir use
ajab kamand hai bū-e-sharāb-ḳhāna-e-ishq

kahīñ hai daaġh kā mazmūñ kahīñ hai soz kā zikr
suno na tum ki bahut garm hai fasāna-e-ishq

ġhalat hai sāhab-e-daulat ko gar ġhanī kahiye
ġhanī vo hai jise allāh de ḳhazāna-e-ishq

jo bahr-e-ġham meñ girā haath dho ke jiine se
usī ke haath bhī aayā dur-e-yagāna-e-ishq

tamām umr isī sahrā kī ḳhaak chhānī hai
jo tum suno to sunā.ūñ koī fasāna-e-ishq

bane haiñ jab se vo yūsuf har ek gāhak hai
khulā huā hai yahāñ bhī dar-e-ḳhazāna-e-ishq

kisī pe dil kā thā aanā ki be-ḳhudī chhā.ī
samand-e-hosh ko aafat hai tāziyāna-e-ishq

jab un ke dil meñ ye aatī hai kuchh suneñ naale
to mujh se kahte haiñ chheḌo koī tarāna-e-ishq

chamak ke daaġh ye kahtā hai dil kī aahoñ se
havā se bujh nahīñ saktā charāġh-e-ḳhāna-e-ishq

ye jāniye ki lagī haath daulat-e-kaunain
mile jo ḳhirman-e-hastī se ek dāna-e-ishq

yahāñ 'ayāz' hai aaqā ġhulām hai 'mahmūd'
'jalīl' kyā maiñ kahūñ tum se kārḳhāna-e-ishq

kahan hum aur kahan ab sharab-KHana-e-ishq
na wo dimagh na wo dil na wo zamana-e-ishq

hua hai shahr-e-KHamoshan mein jab guzar mera
suna kiya hun lab-e-gor se fasana-e-ishq

KHayal-e-ruKH pe hai mauquf dil ki aabaadi
kabhi na gul ho ilahi charagh-e-KHana-e-ishq

bhare hue hain hasinan-e-sim-tan dil mein
KHuda kare kabhi KHali na ho KHazana-e-ishq

gai dimagh mein jis ke kiya asir use
ajab kamand hai bu-e-sharab-KHana-e-ishq

kahin hai dagh ka mazmun kahin hai soz ka zikr
suno na tum ki bahut garm hai fasana-e-ishq

ghalat hai sahab-e-daulat ko gar ghani kahiye
ghani wo hai jise allah de KHazana-e-ishq

jo bahr-e-gham mein gira hath dho ke jine se
usi ke hath bhi aaya dur-e-yagana-e-ishq

tamam umr isi sahra ki KHak chhani hai
jo tum suno to sunaun koi fasana-e-ishq

bane hain jab se wo yusuf har ek gahak hai
khula hua hai yahan bhi dar-e-KHazana-e-ishq

kisi pe dil ka tha aana ki be-KHudi chhai
samand-e-hosh ko aafat hai taziyana-e-ishq

jab un ke dil mein ye aati hai kuchh sunen nale
to mujh se kahte hain chheDo koi tarana-e-ishq

chamak ke dagh ye kahta hai dil ki aahon se
hawa se bujh nahin sakta charagh-e-KHana-e-ishq

ye jaaniye ki lagi hath daulat-e-kaunain
mile jo KHirman-e-hasti se ek dana-e-ishq

yahan 'ayaz' hai aaqa ghulam hai 'mahmud'
'jalil' kya main kahun tum se karKHana-e-ishq

RECITATIONS Fahad Husain



00:00/00:00 JALIL MANIKPURI - KAHAN HUM AUR KAHAN AB Fahad Husain

Source: Taaj-e-sukhan

Leave a comment

+