visāl-e-yār bhī hai daur meñ sharāb bhī hai
qamar bhī hai mire pahlū meñ āftāb bhī hai

ye husn kī nahīñ jādūgarī to phir kyā hai
ki terī aañkh meñ shoḳhī bhī hai hijāb bhī hai

kisī ko taab kahāñ hai ki tujh ko dekh sake
jo nuur hai tire ruḳh par vahī naqāb bhī hai

subūt-e-ishq ko ye do gavāh kaafī haiñ
jigar meñ daaġh bhī hai dil meñ iztirāb bhī hai

ġhurūr-e-husn tujhe jis qadar ho zebā hai
ḳhudā ke fazl se sūrat bhī hai shabāb bhī hai

sitam kī chaal sitam kī adā sitam kī nigāh
tire sitam kā sitamgar koī hisāb bhī hai

mire liye nahīñ piine kī kuchh kamī saaqī
ki chashm-e-mast bhī hai sāġhar-e-sharāb bhī hai

'jalīl' ne tumheñ chāhā to kyā gunāh kiyā
tumhīñ batāo tumhārā koī javāb bhī hai

visal-e-yar bhi hai daur mein sharab bhi hai
qamar bhi hai mere pahlu mein aaftab bhi hai

ye husn ki nahin jadugari to phir kya hai
ki teri aankh mein shoKHi bhi hai hijab bhi hai

kisi ko tab kahan hai ki tujh ko dekh sake
jo nur hai tere ruKH par wahi naqab bhi hai

subut-e-ishq ko ye do gawah kafi hain
jigar mein dagh bhi hai dil mein iztirab bhi hai

ghurur-e-husn tujhe jis qadar ho zeba hai
KHuda ke fazl se surat bhi hai shabab bhi hai

sitam ki chaal sitam ki ada sitam ki nigah
tere sitam ka sitamgar koi hisab bhi hai

mere liye nahin pine ki kuchh kami saqi
ki chashm-e-mast bhi hai saghar-e-sharab bhi hai

'jalil' ne tumhein chaha to kya gunah kiya
tumhin batao tumhaara koi jawab bhi hai

Source: Book : Kainat-e-Jalil Manakpuri (Pg. 227)