maze betābiyoñ ke aa rahe haiñ
vo ham ko ham unheñ samjhā rahe haiñ

abhī kal tak the kaise bhole-bhāle
zarā ubhre haiñ aafat Dhā rahe haiñ

kahā us ne savāl-e-vasl sun kar
ki mujh se aap kuchh farmā rahe haiñ

vo bijlī haiñ to hoñ un ko mubārak
mujhe kis vāste taḌpā rahe haiñ

mujhe to intizār-e-chāragar hai
ilāhī ġhash pe ġhash kyuuñ aa rahe haiñ

rahe dāman bharā un kā hamesha
lahad par phuul jo barsā rahe haiñ

sunā kar qissa-e-parvāna-o-sham.a
hamāre dil ko vo garmā rahe haiñ

do roza husn par phūle haiñ kyā gul
baḌe kam-zarf haiñ itrā rahe haiñ

kabhī ham ne piyā thā bāda-e-ishq
'jalīl' us ke maze ab aa rahe haiñ

maze betabiyon ke aa rahe hain
wo hum ko hum unhen samjha rahe hain

abhi kal tak the kaise bhole-bhaale
zara ubhre hain aafat Dha rahe hain

kaha us ne sawal-e-wasl sun kar
ki mujh se aap kuchh farma rahe hain

wo bijli hain to hon un ko mubarak
mujhe kis waste taDpa rahe hain

mujhe to intizar-e-chaaragar hai
ilahi ghash pe ghash kyun aa rahe hain

rahe daman bhara un ka hamesha
lahad par phul jo barsa rahe hain

suna kar qissa-e-parwana-o-shama
hamare dil ko wo garma rahe hain

do roza husn par phule hain kya gul
baDe kam-zarf hain itra rahe hain

kabhi hum ne piya tha baada-e-ishq
'jalil' us ke maze ab aa rahe hain

RECITATIONS Fasih Akmal



00:00/00:00 maze betabiyon ke aa rahe hain Fasih Akmal