maiñ hī dastak dene vaalā maiñ hī dastak sunñe vaalā
apne ghar kī barbādī par maiñ hī sar ko dhunñe vaalā

jīvan kā sañgīt achānak antim sur ko chhū letā hai
hañstā hī rahtā hai phir bhī mere andar marne vaalā

rishte bosīda dīvāroñ ke jaise Dhah jaa.eñ pal meñ
lekin maiñ bhī dīvāroñ ke malbe se sar chunñe vaalā

lafzoñ ke paañv ko chhū kar āshirvādī lahje meñ
merī ġhazloñ meñ bhī ik jazba hai dil ko chhūne vaalā

thoḌī sī mohlat miltī to pāpoñ se maiñ hī bhar letā
jīvan kā ik suffa bhī thā kaise saada rahne vaalā

maiñ apne dukh ke sāgar meñ koī patthar phekūñ kaise
barsoñ tak nā-mumkin hai vo lauTe lahreñ ginñe vaalā

main hi dastak dene wala main hi dastak sunne wala
apne ghar ki barbaadi par main hi sar ko dhunne wala

jiwan ka sangit achanak antim sur ko chhu leta hai
hansta hi rahta hai phir bhi mere andar marne wala

rishte bosida diwaron ke jaise Dhah jaen pal mein
lekin main bhi diwaron ke malbe se sar chunne wala

lafzon ke panw ko chhu kar aashirwadi lahje mein
meri ghazlon mein bhi ek jazba hai dil ko chhune wala

thoDi si mohlat milti to papon se main hi bhar leta
jiwan ka ek suffa bhi tha kaise sada rahne wala

main apne dukh ke sagar mein koi patthar phekun kaise
barson tak na-mumkin hai wo lauTe lahren ginne wala

Source: Book : Ehsas Ki Hijrat (Pg. 42)