husūl-e-ġham ba-alfāz-e-digar kuchh aur hotā hai
dil-e-barbād kā azm-e-safar kuchh aur hotā hai

tulū-e-sub.h kī kirneñ bahut hī ḳhuub haiñ lekin
jamāl-e-shahr-e-dil vaqt-e-sahar kuchh aur hotā hai

masā.ib kis ko kahte haiñ tumhīñ jaano tumhīñ samjho
jahāñ vaalo hamārā dil jigar kuchh aur hotā hai

sharāb-e-talḳh kyā hai zahr-e-qātil tak piyā ham ne
magar in mast nazroñ kā asar kuchh aur hotā hai

muqābil aa.ine ke aa.ina bhī ham ne dekhā hai
ghaTāoñ meñ mirā rashk-e-qamar kuchh aur hotā hai

jahāñ pābandiyāñ lāzim na hoñ sajda-guzāroñ par
ibādat ke liye vo sañg-e-dar kuchh aur hotā hai

'jalīl' aksar ye paayā imtiyāz-e-ishq meñ ham ne
idhar kuchh aur hotā hai udhar kuchh aur hotā hai

husul-e-gham ba-alfaz-e-digar kuchh aur hota hai
dil-e-barbaad ka azm-e-safar kuchh aur hota hai

tulu-e-subh ki kirnen bahut hi KHub hain lekin
jamal-e-shahr-e-dil waqt-e-sahar kuchh aur hota hai

masaib kis ko kahte hain tumhin jaano tumhin samjho
jahan walo hamara dil jigar kuchh aur hota hai

sharab-e-talKH kya hai zahr-e-qatil tak piya hum ne
magar in mast nazron ka asar kuchh aur hota hai

muqabil aaine ke aaina bhi hum ne dekha hai
ghaTaon mein mera rashk-e-qamar kuchh aur hota hai

jahan pabandiyan lazim na hon sajda-guzaron par
ibaadat ke liye wo sang-e-dar kuchh aur hota hai

'jalil' aksar ye paya imtiyaz-e-ishq mein hum ne
idhar kuchh aur hota hai udhar kuchh aur hota hai

Source: Lahoo Rang