kise ḳhabar ibtidā kī anjām kaun jaane
gumān bātil ḳhayāl sab ḳhaam kaun jaane

tamām lafzoñ kā ek mafhūm kaun samjhe
tamām chīzoñ kā ek hī naam kaun jaane

pujāriyoñ ke liye azal se taḌap rahe haiñ
samay ke pahlū meñ kitne asnām kaun jaane

nikal ke din kī tamāzatoñ se vafā kā sūraj
huā hai ḳhuuñ kis tarah sar-e-shām kaun jaane

udaas jazboñ ke daldalī rāstoñ pe 'ā.alī'
sambhal gayā chal ke gām-do-gām kaun jaane

kise KHabar ibtida ki anjam kaun jaane
guman baatil KHayal sab KHam kaun jaane

tamam lafzon ka ek mafhum kaun samjhe
tamam chizon ka ek hi nam kaun jaane

pujariyon ke liye azal se taDap rahe hain
samay ke pahlu mein kitne asnam kaun jaane

nikal ke din ki tamazaton se wafa ka suraj
hua hai KHun kis tarah sar-e-sham kaun jaane

udas jazbon ke daldali raston pe 'aali'
sambhal gaya chal ke gam-do-gam kaun jaane

Source: Funoon(Jadeed Ghazal Number: Volume-002)