mujhe ḳhushī hai mirī us se rasm-o-rāh nahīñ
vo shaḳhs dil se kisī kā bhī ḳhair-ḳhvāh nahīñ

sabhī ḳhamosh haiñ aapas kī dushmanī meñ yahāñ
kisī kī be-gunahī kā koī gavāh nahīñ

vo mansaboñ kī havā meñ hai kisī tarah samjhe
ġhulām shahr meñ koī bhī kaj-kulāh nahīñ

ham apne shauq diyoñ kī salāmtī chāheñ
kisī ke anjum-o-mahtāb par nigāh nahīñ

anā ke mol na taḳht-e-shahī bhī le aa.eñ
vagarna kis ko tamannā-e-nām-o-jāh nahīñ

mujhe KHushi hai meri us se rasm-o-rah nahin
wo shaKHs dil se kisi ka bhi KHair-KHwah nahin

sabhi KHamosh hain aapas ki dushmani mein yahan
kisi ki be-gunahi ka koi gawah nahin

wo mansabon ki hawa mein hai kisi tarah samjhe
ghulam shahr mein koi bhi kaj-kulah nahin

hum apne shauq diyon ki salamti chahen
kisi ke anjum-o-mahtab par nigah nahin

ana ke mol na taKHt-e-shahi bhi le aaen
wagarna kis ko tamanna-e-nam-o-jah nahin

Source: Book : Funoon (Monthly) (Pg. 542) Author : Ahmad Nadeem Qasmi Publication : 4 Maklood Road, Lahore (25Edition Nov. Dec. 1986) Edition : 25Edition Nov. Dec. 1986