jafā kī us se shikāyat zarā nahīñ aatī
vo yaad hī hameñ shukr-e-ḳhudā nahīñ aatī

nikal ke tā-ba-lab āh-e-rasā nahīñ aatī
karāhtā hai jo ab dil sadā nahīñ aatī

hamārī ḳhaak kī miTTī hai kyā ḳharāb ai charḳh
kabhī idhar ko udhar kī havā nahīñ aatī

shab-e-visāl kahāñ ḳhvāb-e-nāz kā mauqa.a
tumhārī niiñd ko aate hayā nahīñ aatī

adū hamārī ayādat ko le ke aa.e unheñ
kahāñ ye mar rahī ab bhī qazā nahīñ aatī

lahad pe aa.e the do phuul bhī chaḌhā jaate
abhī tak aap meñ bū-e-vafā nahīñ aatī

mirī lahad ko vo un kā ye kah kar Thukrānā
sadā-e-nāra-e-sad-marhabā nahīñ aatī

sitam hai aur mire dil-shikan kā ye kahnā
shikast-e-shīsha-e-dil kī sadā nahīñ aatī

'jalāl' ham ye na māneñge tū use nahīñ yaad
tujhe kabhī koī hichkī bhī kyā nahīñ aatī

jafa ki us se shikayat zara nahin aati
wo yaad hi hamein shukr-e-KHuda nahin aati

nikal ke ta-ba-lab aah-e-rasa nahin aati
karahta hai jo ab dil sada nahin aati

hamari KHak ki miTTi hai kya KHarab ai charKH
kabhi idhar ko udhar ki hawa nahin aati

shab-e-visal kahan KHwab-e-naz ka mauqa
tumhaari nind ko aate haya nahin aati

adu hamari ayaadat ko le ke aae unhen
kahan ye mar rahi ab bhi qaza nahin aati

lahad pe aae the do phul bhi chaDha jate
abhi tak aap mein bu-e-wafa nahin aati

meri lahad ko wo un ka ye kah kar Thukrana
sada-e-nara-e-sad-marhaba nahin aati

sitam hai aur mere dil-shikan ka ye kahna
shikast-e-shisha-e-dil ki sada nahin aati

'jalal' hum ye na manenge tu use nahin yaad
tujhe kabhi koi hichki bhi kya nahin aati

Source: Book : Intekhab-e-kalam  Miir Zamin Ali Jalal (Pg. 77)