tū ḳhud bhī nahīñ aur tirā saanī nahīñ miltā
paiġhām tirā terī zabānī nahīñ miltā

maiñ biich samundar meñ huuñ aur pyaas se betāb
piine ko to ik buuñd bhī paanī nahīñ miltā

duniyā ke karishmoñ meñ muamma to yahī hai
duniyā ke karishmāt kā baanī nahīñ miltā

merā bhī to ik dost thā ġham bāñTne vaalā
ab dasht-e-balā meñ vahī jaanī nahīñ miltā

jo martā hai jī uThtā hai vo ruup badal kar
mujh ko to yahāñ koī bhī faanī nahīñ miltā

shahkār sī tasvīr mirī koī banātā
bahzād mayassar nahīñ maanī nahīñ miltā

kaabe ke kisī goshe meñ mil jā.egā shāyad
but-ḳhāne meñ firdaus-makānī nahīñ miltā

uslūb purāne haiñ to alfāz haiñ be-rañg
nādir sā 'zafar' tarz-e-lisānī nahīñ miltā

tu KHud bhi nahin aur tera sani nahin milta
paigham tera teri zabani nahin milta

main bich samundar mein hun aur pyas se betab
pine ko to ek bund bhi pani nahin milta

duniya ke karishmon mein muamma to yahi hai
duniya ke karishmat ka bani nahin milta

mera bhi to ek dost tha gham banTne wala
ab dasht-e-bala mein wahi jaani nahin milta

jo marta hai ji uThta hai wo rup badal kar
mujh ko to yahan koi bhi fani nahin milta

shahkar si taswir meri koi banata
bahzad mayassar nahin mani nahin milta

kabe ke kisi goshe mein mil jaega shayad
but-KHane mein firdaus-makani nahin milta

uslub purane hain to alfaz hain be-rang
nadir sa 'zafar' tarz-e-lisani nahin milta

RECITATIONS Nomaan Shauque



00:00/00:00 tu KHud bhi nahin aur tera sani nahin milta Nomaan Shauque