tū bhī vahāñ nahīñ mohabbat jahāñ nahīñ
har āstān-e-husn tirā āstāñ nahīñ

ulfat kī thiiñ dalīl tirī bad-gumāniyāñ
ab bad-gumān maiñ huuñ ki tū bad-gumāñ nahīñ

dilkash hai gulsitāñ bhī tire husn kī tarah
lekin tirī adā kī tarah dil-sitāñ nahīñ

nemat milī hai tum ko javānī kī dosto
afsos hai ki azm tumhārā javāñ nahīñ

kyūñkar kahūñ ki log haiñ sū-e-adm-e-ravāñ
is kārvāñ meñ gard-e-pas-e-kārvāñ nahīñ

hai be-niyāz-e-shādī-o-ġham merī be-ḳhudī
ye vo chaman hai jis meñ bahār o ḳhizāñ nahīñ

nādim mirā sukūt ki hai qalb-sog-vār
duniyā samajh rahī hai ḳhamoshī fuġhāñ nahīñ

tu bhi wahan nahin mohabbat jahan nahin
har aastan-e-husn tera aastan nahin

ulfat ki thin dalil teri bad-gumaniyan
ab bad-guman main hun ki tu bad-guman nahin

dilkash hai gulsitan bhi tere husn ki tarah
lekin teri ada ki tarah dil-sitan nahin

nemat mili hai tum ko jawani ki dosto
afsos hai ki azm tumhaara jawan nahin

kyunkar kahun ki log hain su-e-adm-e-rawan
is karwan mein gard-e-pas-e-karwan nahin

hai be-niyaz-e-shadi-o-gham meri be-KHudi
ye wo chaman hai jis mein bahaar o KHizan nahin

nadim mera sukut ki hai qalb-sog-war
duniya samajh rahi hai KHamoshi fughan nahin