sab ko gumān bhī ki maiñ āgāh-e-rāz thā
kis darja kāmyāb fareb-e-majāz thā

misl-e-mah-e-do-hafta vahī sarfarāz thā
jis kī jabīn-e-shauq pe dāġh-e-niyāz thā

pūchho na hāl-e-kashmakash-e-yās-o-ārzū
vo bhī ajiib marhala-e-jāñ-gudāz thā

jab tak haqīqatoñ se mirā dil thā be-ḳhabar
bechāra mubtalā-e-ġham-e-imtiyāz thā

jhoñkā havā-e-sarv kā rindoñ ke vāste
ḳhum-ḳhāna-e-bahār se hukm-e-javāz thā

ahl-e-jahāñ ke kufr o tavahhum kā kyā ilaaj
ā.īna kah rahā hai ki ā.īna-sāz thā

muzmir the merī zaat meñ asrār-e-kā.enāt
maiñ aap raaz aap hī ḳhud sharah-e-rāz thā

aa.eñ pasand kyā use duniyā kī rāhateñ
jo lazzat-āshnā-e-sitam-hā-e-nāz thā

ḳhilqat samajh rahī thī jise iztirāb-e-dil
pinhāñ usī meñ hasti-e-āshiq kā raaz thā

achchhā huā hamesha ko chup ho gayā 'ravāñ'
ik ik nafas ġharīb kā hastī-gudāz thā

sab ko guman bhi ki main aagah-e-raaz tha
kis darja kaamyab fareb-e-majaz tha

misl-e-mah-e-do-hafta wahi sarfaraaz tha
jis ki jabin-e-shauq pe dagh-e-niyaz tha

puchho na haal-e-kashmakash-e-yas-o-arzu
wo bhi ajib marhala-e-jaan-gudaz tha

jab tak haqiqaton se mera dil tha be-KHabar
bechaara mubtala-e-gham-e-imtiyaz tha

jhonka hawa-e-sarw ka rindon ke waste
KHum-KHana-e-bahaar se hukm-e-jawaz tha

ahl-e-jahan ke kufr o tawahhum ka kya ilaj
aaina kah raha hai ki aaina-saz tha

muzmir the meri zat mein asrar-e-kaenat
main aap raaz aap hi KHud sharah-e-raaz tha

aaen pasand kya use duniya ki rahaten
jo lazzat-ashna-e-sitam-ha-e-naz tha

KHilqat samajh rahi thi jise iztirab-e-dil
pinhan usi mein hasti-e-ashiq ka raaz tha

achchha hua hamesha ko chup ho gaya 'rawan'
ek ek nafas gharib ka hasti-gudaz tha