mirī chashm-e-tamāshā ab jahāñ hai
tajallī kārvāñ dar kārvāñ hai

yaqīñ hai āḳhirī manzil gumāñ kī
yaqīñ kī āḳhirī manzil gumāñ hai

vo mujh se duur to itne nahīñ haiñ
faqat ik be-yaqīnī darmiyāñ hai

ye raaz ahl-e-fuġhāñ par faash kar do
ḳhamoshī bhī ik andāz-e-fuġhāñ hai

ye mīr-e-kārvāñ se koī kah de
ki maiñ huuñ aur talāsh-e-kārvāñ hai

meri chashm-e-tamasha ab jahan hai
tajalli karwan dar karwan hai

yaqin hai aaKHiri manzil guman ki
yaqin ki aaKHiri manzil guman hai

wo mujh se dur to itne nahin hain
faqat ek be-yaqini darmiyan hai

ye raaz ahl-e-fughan par fash kar do
KHamoshi bhi ek andaz-e-fughan hai

ye mir-e-karwan se koi kah de
ki main hun aur talash-e-karwan hai

Source: Book : Mujalla Dastavez (Pg. 280) Author : Aziz Nabeel Publication : Edarah Dastavez (2013-14) Edition : 2013-14