jo dil kā raaz be-āh-o-fuġhāñ kahnā hī paḌtā hai
to phir apne qafas ko āshiyāñ kahnā hī paḌtā hai

tujhe ai tā.ir-e-shāḳh-e-nasheman kyā ḳhabar is kī
kabhī sayyād ko bhī bāġhbāñ kahnā hī paḌtā hai

ye duniyā hai yahāñ har kaam chaltā hai salīqe se
yahāñ patthar ko bhī la.al-e-girāñ kahnā hī paḌtā hai

ba-faiz-e-maslahat aisā bhī hotā hai zamāne meñ
ki rahzan ko amīr-e-kārvāñ kahnā hī paḌtā hai

muravvat kī qasam terī ḳhushī ke vāste akasr
sarāb-e-dasht ko āb-e-ravāñ kahnā hī paḌtā hai

zabānoñ par diloñ kī baat jab ham lā nahīñ sakte
jafā ko phir vafā kī dāstāñ kahnā hī paḌtā hai

na pūchho kyā guzartī hai dil-e-ḳhuddār par akasr
kisī be-mehr ko jab mehrbāñ kahnā hī paḌtā hai

jo dil ka raaz be-ah-o-fughan kahna hi paDta hai
to phir apne qafas ko aashiyan kahna hi paDta hai

tujhe ai tair-e-shaKH-e-nasheman kya KHabar is ki
kabhi sayyaad ko bhi baghban kahna hi paDta hai

ye duniya hai yahan har kaam chalta hai saliqe se
yahan patthar ko bhi lal-e-giran kahna hi paDta hai

ba-faiz-e-maslahat aisa bhi hota hai zamane mein
ki rahzan ko amir-e-karwan kahna hi paDta hai

murawwat ki qasam teri KHushi ke waste akasr
sarab-e-dasht ko aab-e-rawan kahna hi paDta hai

zabanon par dilon ki baat jab hum la nahin sakte
jafa ko phir wafa ki dastan kahna hi paDta hai

na puchho kya guzarti hai dil-e-KHuddar par akasr
kisi be-mehr ko jab mehrban kahna hi paDta hai

Source: Book : Noquush (Pg. B-356 E370) Publication : Nuqoosh Press Lahore (May June 1954) Edition : May June 1954