terā ḳhayāl hai dil-e-hairāñ liye hue
yā zarra āftāb kā sāmāñ liye hue

dekhā unheñ jo dīda-e-hairāñ liye hue
dil rah gayā jarāhat-e-pinhāñ liye hue

maiñ phir huuñ iltifāt-e-gurezāñ kā muntazir
ik yād-e-iltifāt-e-gurezāñ liye hue

maiñ chheḌne lagā huuñ phir apnī na.ī ġhazal
aa jaao phir tabassum-e-pinhāñ liye hue

kyā bebasī hai ye ki tire ġham ke saath saath
maiñ apne dil meñ huuñ ġham-e-daurāñ liye hue

furqat tirī to ek bahāna thī varna dost
dil yuuñ bhī hai mirā ġham-e-pinhāñ liye hue

ab qalb-e-muztarib meñ nahīñ tāb-e-dard-e-hijr
ab aa bhī jaao dard kā darmāñ liye hue

sirf ek shrt-e-dīda-e-bīnā hai ai kalīm
zarre bhī haiñ tajlli-e-pinhāñ liye hue

maiñ ne ġhazal kahī hai jigar kī zamīn meñ
dil hai mirā nadāmat-e-pinhāñ liye hue

āzād zauq-e-dīd na ho ḳhaam to yahāñ
har ā.īna hai jalva-e-jānāñ liye hue

tera KHayal hai dil-e-hairan liye hue
ya zarra aaftab ka saman liye hue

dekha unhen jo dida-e-hairan liye hue
dil rah gaya jarahat-e-pinhan liye hue

main phir hun iltifat-e-gurezan ka muntazir
ek yaad-e-iltifat-e-gurezan liye hue

main chheDne laga hun phir apni nai ghazal
aa jao phir tabassum-e-pinhan liye hue

kya bebasi hai ye ki tere gham ke sath sath
main apne dil mein hun gham-e-dauran liye hue

furqat teri to ek bahana thi warna dost
dil yun bhi hai mera gham-e-pinhan liye hue

ab qalb-e-muztarib mein nahin tab-e-dard-e-hijr
ab aa bhi jao dard ka darman liye hue

sirf ek shrt-e-dida-e-bina hai ai kalim
zarre bhi hain tajlli-e-pinhan liye hue

main ne ghazal kahi hai jigar ki zamin mein
dil hai mera nadamat-e-pinhan liye hue

aazad zauq-e-did na ho KHam to yahan
har aaina hai jalwa-e-jaanan liye hue