kahne ko to kyā kyā na dil-e-zār meñ aa.e
har baat kahāñ qālib-e-iz.hār meñ aa.e

nazdīk jo pahuñche to vo aahoñ kā dhuāñ thā
kahne ko to ham sāya-e-dīvār meñ aa.e

har mauja-e-ḳhūñ sar se guzar jaa.e to achchhā
har phuul mire halqa-e-dastār meñ aa.e

ham apnī salīboñ kī hifāzat meñ khaḌe haiñ
ab jo bhī shikan gesū-e-dil-dār meñ aa.e

paañv meñ agar tauq-o-salāsil haiñ to kyā ġham
ai ham-safaro farq na raftār meñ aa.e

ik umr bhaTakte hue guzrī hai junūñ meñ
ab kaun fareb-e-nigah-e-yār meñ aa.e

ai kaash kabhī us kā idhar se bhī guzar ho
ik din to sabā lauT ke gulzār meñ aa.e

jachte bhī to kyā chashm-e-ḳharīdār meñ 'tāhir'
ham kaun se yūsuf the jo bāzār meñ aa.e

kahne ko to kya kya na dil-e-zar mein aae
har baat kahan qalib-e-izhaar mein aae

nazdik jo pahunche to wo aahon ka dhuan tha
kahne ko to hum saya-e-diwar mein aae

har mauja-e-KHun sar se guzar jae to achchha
har phul mere halqa-e-dastar mein aae

hum apni salibon ki hifazat mein khaDe hain
ab jo bhi shikan gesu-e-dil-dar mein aae

panw mein agar tauq-o-salasil hain to kya gham
ai ham-safaro farq na raftar mein aae

ek umr bhaTakte hue guzri hai junun mein
ab kaun fareb-e-nigah-e-yar mein aae

ai kash kabhi us ka idhar se bhi guzar ho
ek din to saba lauT ke gulzar mein aae

jachte bhi to kya chashm-e-KHaridar mein 'tahir'
hum kaun se yusuf the jo bazar mein aae