ġham-e-daurāñ ġham-e-jānāñ ġham-e-jāñ hai ki nahīñ
dil-sitāñ silsila-e-ġham-zadagāñ hai ki nahīñ

har nafas bazm-e-gulistāñ meñ ġhazal-ḳhvāñ thā kabhī
har nafas nāla-kashāñ nauha-kunāñ hai ki nahīñ

har nazar naġhma-sarā anjuman-ārā thī kabhī
har nazar hairatī-e-rañg-e-jahāñ hai ki nahīñ

har zabāñ par thā kabhī tazkira-e-daur-e-bahār
har zabāñ shikva-gar-e-jaur-e-ḳhizāñ hai ki nahīñ

mai-chakāñ bāda-nishāñ the lab-e-gul-rañg kabhī
lab-e-gul-rañg pe zaḳhmoñ kā gumāñ hai ki nahīñ

surma-e-chashm-e-ināyat kī hikāyat chhoḌo
aaj har aañkh meñ aahoñ kā dhuāñ hai ki nahīñ

qāfile jaane ghaTāoñ ke kahāñ utreñge
har ḳham-e-zulf ba-hasrat-nigarāñ hai ki nahīñ

dasht-e-vahshat se nahīñ kam ye jahān-e-gul-o-bū
sūrat-e-reg-e-ravāñ umr-e-ravāñ hai ki nahīñ

naġhma-e-bād-e-bahāri jise tum kahte ho
jaras-e-qāfila-e-gul kī fuġhāñ hai ki nahīñ

na to bulbul kī navā hai na sadā-e-tā.ūs
sehn-e-gulzār meñ ab amn-o-amāñ hai ki nahīñ

mujh se kyā pūchhte ho kaun yahāñ tak pahuñchā
surḳhī-e-ḳhār-e-bayābāñ se ayaañ hai ki nahīñ

zindagī kuchh bhī sahī phir bhī baḌī daulat hai
maut sī shai bhī yahāñ jins-e-girāñ hai ki nahīñ

sūrat-e-lutf-o-karam ye ho to dil kyuuñ na jale
aag patthar ke bhī siine meñ nihāñ hai ki nahīñ

zulm chup-chāp sahe jāoge āḳhir kab tak
ai asīrān-e-qafas muñh meñ zabāñ hai ki nahīñ

ye adab-gāh-e-mohabbat hai jo chup huuñ 'tāhir'
varna yaañ kaun sā andāz-e-bayāñ hai ki nahīñ

gham-e-dauran gham-e-jaanan gham-e-jaan hai ki nahin
dil-sitan silsila-e-gham-zadagan hai ki nahin

har nafas bazm-e-gulistan mein ghazal-KHwan tha kabhi
har nafas nala-kashan nauha-kunan hai ki nahin

har nazar naghma-sara anjuman-ara thi kabhi
har nazar hairati-e-rang-e-jahan hai ki nahin

har zaban par tha kabhi tazkira-e-daur-e-bahaar
har zaban shikwa-gar-e-jaur-e-KHizan hai ki nahin

mai-chakan baada-nishan the lab-e-gul-rang kabhi
lab-e-gul-rang pe zaKHmon ka guman hai ki nahin

surma-e-chashm-e-inayat ki hikayat chhoDo
aaj har aankh mein aahon ka dhuan hai ki nahin

qafile jaane ghaTaon ke kahan utrenge
har KHam-e-zulf ba-hasrat-nigaran hai ki nahin

dasht-e-wahshat se nahin kam ye jahan-e-gul-o-bu
surat-e-reg-e-rawan umr-e-rawan hai ki nahin

naghma-e-baad-e-bahaari jise tum kahte ho
jaras-e-qafila-e-gul ki fughan hai ki nahin

na to bulbul ki nawa hai na sada-e-taus
sehn-e-gulzar mein ab amn-o-aman hai ki nahin

mujh se kya puchhte ho kaun yahan tak pahuncha
surKHi-e-KHar-e-bayaban se ayan hai ki nahin

zindagi kuchh bhi sahi phir bhi baDi daulat hai
maut si shai bhi yahan jins-e-giran hai ki nahin

surat-e-lutf-o-karam ye ho to dil kyun na jale
aag patthar ke bhi sine mein nihan hai ki nahin

zulm chup-chap sahe jaoge aaKHir kab tak
ai asiran-e-qafas munh mein zaban hai ki nahin

ye adab-gah-e-mohabbat hai jo chup hun 'tahir'
warna yan kaun sa andaz-e-bayan hai ki nahin

Source: Funoon(Jadeed Ghazal Number: Volume-002)