pīchhā hī nahīñ chhoḌtī ghar baar kī ḳhushbū
raste se ayaañ hai dar-o-dīvār kī ḳhushbū

kab kaise kahāñ se banī pur-pech galī meñ
bechain kiye rahtī hai asrār kī ḳhushbū

maiñ apne tasavvur meñ huuñ ḳhush-hāl barādar
qadmoñ meñ paḌī hai mire darbār kī ḳhushbū

tum ajnabī qadmoñ se nikal jaao musāfir
paanā hai kisī aur ko gulzār kī ḳhushbū

ashkoñ ke jharoke meñ bhī dar aa.ī hai aksar
hairān tabassum meñ basī yaar kī ḳhushbū

ik gul pe qanā.at hai kahāñ bahtī havā ko
har-vaqt liye phirtī hai do-chār kī ḳhushbū

barsoñ jo rahī dafn kisī zaḳhm-e-jigar meñ
paa.el se ugī aaj vo jhankār kī ḳhushbū

āvāz pe takiya na lagānā kabhī 'ja.afar'
ḳhāmosh sadā detī hai us paar kī ḳhushbū

pichha hi nahin chhoDti ghar bar ki KHushbu
raste se ayan hai dar-o-diwar ki KHushbu

kab kaise kahan se bani pur-pech gali mein
bechain kiye rahti hai asrar ki KHushbu

main apne tasawwur mein hun KHush-haal baradar
qadmon mein paDi hai mere darbar ki KHushbu

tum ajnabi qadmon se nikal jao musafir
pana hai kisi aur ko gulzar ki KHushbu

ashkon ke jharoke mein bhi dar aai hai aksar
hairan tabassum mein basi yar ki KHushbu

ek gul pe qanaat hai kahan bahti hawa ko
har-waqt liye phirti hai do-chaar ki KHushbu

barson jo rahi dafn kisi zaKHm-e-jigar mein
pael se ugi aaj wo jhankar ki KHushbu

aawaz pe takiya na lagana kabhi 'jafar'
KHamosh sada deti hai us par ki KHushbu