abhī hai ġhair ke altāf se jafā-e-habīb
vahī razā hai hamārī jo hai razā-e-habīb

na samjhūñ apnā kisī ko raqīb rashk se maiñ
vo merā dost hai jo hove āshnā-e-habīb

vo ḳhvāh qatl kare ḳhvāh merī jaañ baḳhshe
ki marg o ziist pe muḳhtār hai razā-e-habīb

na teġh-e-yār se gardan phirā.ūñ maiñ hargiz
ki ain-lutf samajhtā huuñ maiñ jafā-e-habīb

patiñge sham.a ke sadqe hoñ bulbuleñ gul par
koī kisī ke fidā ho maiñ huuñ fidā-e-habīb

bahisht kī mujhe tarġhīb de na tū vaa.iz
kisī kī mujh ko tamannā nahīñ sivā.e habīb

hamesha mujh se vo kahtā thā mar kahīñ 'hasrat'
hazār shukr pazīrā.ī huī duā-e-habīb

abhi hai ghair ke altaf se jafa-e-habib
wahi raza hai hamari jo hai raza-e-habib

na samjhun apna kisi ko raqib rashk se main
wo mera dost hai jo howe aashna-e-habib

wo KHwah qatl kare KHwah meri jaan baKHshe
ki marg o zist pe muKHtar hai raza-e-habib

na tegh-e-yar se gardan phiraun main hargiz
ki ain-lutf samajhta hun main jafa-e-habib

patinge shama ke sadqe hon bulbulen gul par
koi kisi ke fida ho main hun fida-e-habib

bahisht ki mujhe targhib de na tu waiz
kisi ki mujh ko tamanna nahin siwae habib

hamesha mujh se wo kahta tha mar kahin 'hasrat'
hazar shukr pazirai hui dua-e-habib

Source: Book : Intekhab-e-Zarrin Urdu Ghazal (Pg. 79) Author : Khvaja Mohammad Zakriya Publication : Sangat Publishers (2009) Edition : 2009