chale jā.iyegā mirī anjuman se
ye kyā sun huuñ tumhāre dahan se

bahāroñ ko rañgīñ banāyā hai ham ne
kahāñ jaa.eñ ahl-e-chaman ham chaman se

kaheñ kis se ham kasmapursī kā aalam
vatan meñ haiñ lekin ġharīb-ul-vatan se

mohabbat ke tohfe samajh kar liye haiñ
mile jis qadar rañj dār-e-mehan se

ye hī hogā āḳhir taġhāful kā hāsil
utar jāoge ek din mere man se

ye mahsūs hotā hai sahrā meñ rah kar
ta.alluq hī jaise nahīñ thā chaman se

sunā kar ġhazal aaj mahfil meñ 'ja.afar'
mujhe daad lenī hai ahl-e-suḳhan se

chale jaiyega meri anjuman se
ye kya sun hun tumhaare dahan se

bahaaron ko rangin banaya hai hum ne
kahan jaen ahl-e-chaman hum chaman se

kahen kis se hum kasmapursi ka aalam
watan mein hain lekin gharib-ul-watan se

mohabbat ke tohfe samajh kar liye hain
mile jis qadar ranj dar-e-mehan se

ye hi hoga aaKHir taghaful ka hasil
utar jaoge ek din mere man se

ye mahsus hota hai sahra mein rah kar
talluq hi jaise nahin tha chaman se

suna kar ghazal aaj mahfil mein 'jafar'
mujhe dad leni hai ahl-e-suKHan se

Source: Book : SAAZ-O-NAVA (Pg. 128) Publication : Raghu Nath suhai ummid