ab firāq-o-visāl baar hue
umr guzrī hai be-qarār hue

is kī be-e'tibāriyoñ ke tufail
kitne hī gul yahāñ pe ḳhaar hue

ḳhvāb do ek hī bache zinda
qatl baaqī to be-shumār hue

kyuuñ rahā ġhairiyat kā sā ehsās
jab bhī ham us se kam kanār hue

mere us ke muāmle ab to
saare aalam pe āshkār hue

kuchh na.ī ye malāmateñ to nahīñ
aise ta.ane to baar baar hue

jurm kyā hai pata nahīñ ab tak
haañ magar roz sañgsār hue

kitne hī trahdār ham jaise
is ḳharābe meñ ḳhāksār hue

kis qadar mubtalā the ham ḳhud meñ
ḳhud se nikle to be-kanār hue

'mīr'-o-'ġhālib' kī ḳhāk-e-pā ke tufail
ham bhī kis darja āb-dār hue

ab firaq-o-visal bar hue
umr guzri hai be-qarar hue

is ki be-e'tibariyon ke tufail
kitne hi gul yahan pe KHar hue

KHwab do ek hi bache zinda
qatl baqi to be-shumar hue

kyun raha ghairiyat ka sa ehsas
jab bhi hum us se kam kanar hue

mere us ke muamle ab to
sare aalam pe aashkar hue

kuchh nai ye malamaten to nahin
aise tane to bar bar hue

jurm kya hai pata nahin ab tak
han magar roz sangsar hue

kitne hi trahdar hum jaise
is KHarabe mein KHaksar hue

kis qadar mubtala the hum KHud mein
KHud se nikle to be-kanar hue

'mir'-o-'ghaalib' ki KHak-e-pa ke tufail
hum bhi kis darja aab-dar hue

Source: Book : Dawat-e-Sang (Pg. 95) Author : Jafar Abbas Publication : Guftagu Publications (2017) Edition : 2017