ik ik kar ke ho ga.e ruḳhsat ab koī armān nahīñ
dil meñ gahrā sannāTā hai ab koī mehmān nahīñ

tum ne bhī sun rakkhā hogā ham bhī sunte aa.e haiñ
jis ke dil meñ dard na ho vo patthar hai insān nahīñ

dard kaḌā ho to bhī aksar patthar ban jaate haiñ log
marne kī ummīd nahīñ hai jiine kā sāmān nahīñ

kuchh mat bolo chup ho jaao bātoñ meñ kyā rakkhā hai
kyuuñ karte ho aisī bāteñ jin bātoñ meñ jaan nahīñ

auroñ jaisī bāteñ mujh ko bhī karnī paḌtī haiñ roz
ye to merī majbūrī hai ye merī pahchān nahīñ

merī bāteñ sīdhī sachchī un meñ koī pech nahīñ
in ko 'mīr' kī ġhazleñ jaano 'ġhālib' kā dīvān nahīñ

dil ko bahlāne kī ḳhātir ham bhī kyā kyā karte haiñ
ḳhuub samajhtā hai vo bhī sab aisā bhī nādān nahīñ

raat ga.e aksar yuuñ hī kyuuñ phuuT phuuT kar rote ho
ḳhaak tale sone vāloñ se milne kā imkān nahīñ

vo thā mere dukh kā sāthī aur tumheñ kyā batlā.eñ
us kā merā jo rishta thā us rishte kā naam nahīñ

vo hotā to phir bhī shāyad dard pe kuchh qaabū rahtā
tanhā.ī se tanhā laḌnā kuchh aisā āsān nahīñ

ek ek kar ke ho gae ruKHsat ab koi arman nahin
dil mein gahra sannaTa hai ab koi mehman nahin

tum ne bhi sun rakkha hoga hum bhi sunte aae hain
jis ke dil mein dard na ho wo patthar hai insan nahin

dard kaDa ho to bhi aksar patthar ban jate hain log
marne ki ummid nahin hai jine ka saman nahin

kuchh mat bolo chup ho jao baaton mein kya rakkha hai
kyun karte ho aisi baaten jin baaton mein jaan nahin

auron jaisi baaten mujh ko bhi karni paDti hain roz
ye to meri majburi hai ye meri pahchan nahin

meri baaten sidhi sachchi un mein koi pech nahin
in ko 'mir' ki ghazlen jaano 'ghaalib' ka diwan nahin

dil ko bahlane ki KHatir hum bhi kya kya karte hain
KHub samajhta hai wo bhi sab aisa bhi nadan nahin

raat gae aksar yun hi kyun phuT phuT kar rote ho
KHak tale sone walon se milne ka imkan nahin

wo tha mere dukh ka sathi aur tumhein kya batlaen
us ka mera jo rishta tha us rishte ka nam nahin

wo hota to phir bhi shayad dard pe kuchh qabu rahta
tanhai se tanha laDna kuchh aisa aasan nahin

Source: Book : Dawat-e-Sang (Pg. 67) Author : Jafar Abbas Publication : Guftagu Publications (2017) Edition : 2017