muddat huī us jān-e-hayā ne ham se ye iqrār kiyā
jitne bhī badnām hue ham utnā us ne pyaar kiyā

pahle bhī ḳhush-chashmoñ meñ ham chaukannā se rahte the
terī soī āñkhoñ ne to aur hameñ hoshiyār kiyā

jaate jaate koī ham se achchhe rahnā kah to gayā
pūchhe lekin pūchhne vaale kis ne ye bīmār kiyā

qatra qatra sirf huā hai ishq meñ apne dil kā lahū
shakl dikhā.ī tab us ne jab āñkhoñ ko ḳhūñ-bār kiyā

ham par kitnī baar paḌe ye daure bhī tanhā.ī ke
jo bhī ham se milne aayā milne se inkār kiyā

ishq meñ kyā nuqsān nafā hai ham ko kyā samjhāte ho
ham ne saarī umr hī yaaro dil kā kārobār kiyā

mahfil par jab niiñd sī chhā.ī sab ke sab ḳhāmosh hue
ham ne tab kuchh sher sunāyā logoñ ko bedār kiyā

ab tum socho ab tum jaano jo chāho ab rañg bharo
ham ne to ik naqsha khīñchā ik ḳhāka tayyār kiyā

desh se jab pardesh sidhāre ham par ye bhī vaqt paḌā
nazmeñ chhoḌī ġhazleñ chhoḌī gītoñ kā bevpār kiyā

muddat hui us jaan-e-haya ne hum se ye iqrar kiya
jitne bhi badnam hue hum utna us ne pyar kiya

pahle bhi KHush-chashmon mein hum chaukanna se rahte the
teri soi aankhon ne to aur hamein hoshiyar kiya

jate jate koi hum se achchhe rahna kah to gaya
puchhe lekin puchhne wale kis ne ye bimar kiya

qatra qatra sirf hua hai ishq mein apne dil ka lahu
shakl dikhai tab us ne jab aankhon ko KHun-bar kiya

hum par kitni bar paDe ye daure bhi tanhai ke
jo bhi hum se milne aaya milne se inkar kiya

ishq mein kya nuqsan nafa hai hum ko kya samjhate ho
hum ne sari umr hi yaro dil ka karobar kiya

mahfil par jab nind si chhai sab ke sab KHamosh hue
hum ne tab kuchh sher sunaya logon ko bedar kiya

ab tum socho ab tum jaano jo chaho ab rang bharo
hum ne to ek naqsha khincha ek KHaka tayyar kiya

desh se jab pardesh sidhaare hum par ye bhi waqt paDa
nazmen chhoDi ghazlen chhoDi giton ka bewpar kiya

Source: Book : urdu kii chunii hu.ii gazale.n (Pg. 88) Publication : sahityaa parkaashak maalbaara delhi (sahityaa parkaashak maalbaara delhi ) Edition : 1963