شریک ہوں اور تازہ ترین معلومات حاصل کریں

خار دہلوی

  • غزل


سوزش غم بہ روئے کار آئی


سوزش غم بہ روئے کار آئی
آہ بھی لب پہ شعلہ بار آئی

چشم گریاں کی آبیاری سے
دل کے داغوں پہ پھر بہار آئی

دست وحشت کی کار فرمائی
تا بہ دامان تار تار آئی

تیرے دیوانے کیا بھلا جانیں
کب خزاں آئی کب بہار آئی

کسمپرسی کا اف رے یہ عالم
یاد ہم کو جفائے یار آئی

دیکھو وہ چھائی اودی اودی گھٹا
مے گساروں کی غم گسار آئی

سوئے گلشن جو آج آ نکلے
یار کی یاد بار بار آئی

بھینی بھینی کسی بدن کی مہک
بوئے گیسوئے مشک بار آئی

غنچہ و گل کا دیکھ کر جوبن
یاد محبوب گلغدار آئی

ہے جوانی خود اپنی مشاطہ
حسن کو کس قدر نکھار آئی

خارؔ الفت کی بات جانے دو
زندگی کس کو سازگار آئی


Leave a comment

+