Subscribe to our newsletter and get our newest updates

Jaan Nisar Akhtar

  • Ghazal


ai dard-e-ishq tujhse mukarne laga hun main


ai dard-e-ishq tujh se mukarne lagā huuñ maiñ
mujh ko sambhāl had se guzarne lagā huuñ maiñ

pahle haqīqatoñ hī se matlab thā aur ab
ek aadh baat farz bhī karne lagā huuñ maiñ

har aan TūTte ye aqīdoñ ke silsile
lagtā hai jaise aaj bikharne lagā huuñ maiñ

ai chashm-e-yār merā sudharnā muhāl thā
terā kamāl hai ki sudharne lagā huuñ maiñ

ye mehr-o-māh arz-o-samā mujh meñ kho ga.e
ik kā.enāt ban ke ubharne lagā huuñ maiñ

itnoñ kā pyaar mujh se sambhālā na jā.egā
logo tumhāre pyaar se Darne lagā huuñ maiñ

dillī kahāñ ga.iiñ tire kūchoñ kī raunaqeñ
galiyoñ se sar jhukā ke guzarne lagā huuñ maiñ

ai dard-e-ishq tujh se mukarne laga hun main
mujh ko sambhaal had se guzarne laga hun main

pahle haqiqaton hi se matlab tha aur ab
ek aadh baat farz bhi karne laga hun main

har aan TuTte ye aqidon ke silsile
lagta hai jaise aaj bikharne laga hun main

ai chashm-e-yar mera sudharna muhaal tha
tera kamal hai ki sudharne laga hun main

ye mehr-o-mah arz-o-sama mujh mein kho gae
ek kaenat ban ke ubharne laga hun main

itnon ka pyar mujh se sambhaala na jaega
logo tumhaare pyar se Darne laga hun main

dilli kahan gain tere kuchon ki raunaqen
galiyon se sar jhuka ke guzarne laga hun main

Videos
This video is playing from YouTube Videos
This video is playing from YouTube Unknown RECITATIONS Nomaan Shauque



00:00/00:00 ai dard-e-ishq tujhse mukarne laga hun main Nomaan Shauque

Leave a comment

+