ash.ār mire yuuñ to zamāne ke liye haiñ
kuchh sher faqat un ko sunāne ke liye haiñ

ab ye bhī nahīñ Thiik ki har dard miTā deñ
kuchh dard kaleje se lagāne ke liye haiñ

socho to baḌī chiiz hai tahzīb badan kī
varna ye faqat aag bujhāne ke liye haiñ

āñkhoñ meñ jo bhar loge to kāñToñ se chubheñge
ye ḳhvāb to palkoñ pe sajāne ke liye haiñ

dekhūñ tire hāthoñ ko to lagtā hai tire haath
mandir meñ faqat diip jalāne ke liye haiñ

ye ilm kā saudā ye risāle ye kitābeñ
ik shaḳhs kī yādoñ ko bhulāne ke liye haiñ

ashaar mere yun to zamane ke liye hain
kuchh sher faqat un ko sunane ke liye hain

ab ye bhi nahin Thik ki har dard miTa den
kuchh dard kaleje se lagane ke liye hain

socho to baDi chiz hai tahzib badan ki
warna ye faqat aag bujhane ke liye hain

aankhon mein jo bhar loge to kanTon se chubhenge
ye KHwab to palkon pe sajaane ke liye hain

dekhun tere hathon ko to lagta hai tere hath
mandir mein faqat dip jalane ke liye hain

ye ilm ka sauda ye risale ye kitaben
ek shaKHs ki yaadon ko bhulane ke liye hain

RECITATIONS Nomaan Shauque Javed Naseem



00:00/00:00 ashaar mere yun to zamane ke liye hain Nomaan Shauque