ahbāb mire dard se kuchh be-ḳhabar na the
ye aur baat hai vo koī chāragar na the

tāqat thī jab badan meñ to darvāza band thā
jab dar khulā qafas kā mire bāl-o-par na the

anjān ham the raah se manzil bhī duur thī
achchhā huā ki aap sharīk-e-safar na the

is vāste bhī mujh ko tirā ġham aziiz hai
jitne bhī ġham mile vo ġham mo'atabar na the

tārīk raat kā thā safar raah pur-ḳhatar
raushan kahīñ charāġh sar-e-rahguzar na the

vo din bhī kyā the dil meñ tamannā na thī koī
takmīl-e-ārzū ke liye dar-ba-dar na the

sailāb-o-zalzale meñ hue kitne ghar tabāh
vo log be-niyāz rahe jin ke ghar na the

kuchh log mil ga.e the yūñhī raah meñ mujhe
jo mere saath saath the vo ham-safar na the

sab ne mirā kalām paḌhā lekin ai 'sa.īd'
jo mere nāqidīn the vo dīda-var na the

ahbab mere dard se kuchh be-KHabar na the
ye aur baat hai wo koi chaaragar na the

taqat thi jab badan mein to darwaza band tha
jab dar khula qafas ka mere baal-o-par na the

anjaan hum the rah se manzil bhi dur thi
achchha hua ki aap sharik-e-safar na the

is waste bhi mujh ko tera gham aziz hai
jitne bhi gham mile wo gham mo'atabar na the

tarik raat ka tha safar rah pur-KHatar
raushan kahin charagh sar-e-rahguzar na the

wo din bhi kya the dil mein tamanna na thi koi
takmil-e-arzu ke liye dar-ba-dar na the

sailab-o-zalzale mein hue kitne ghar tabah
wo log be-niyaz rahe jin ke ghar na the

kuchh log mil gae the yunhi rah mein mujhe
jo mere sath sath the wo ham-safar na the

sab ne mera kalam paDha lekin ai 'said'
jo mere naqidin the wo dida-war na the

Source: Book : Shakh-e-Gul (Pg. 47) Author : Qazi Gaus Muhiuddin Ahmed Siddique Publication : Matla-e-adab Publisher (2007) Edition : 2007