zindagī meñ jo ye ravānī hai
ek kirdār kī kahānī hai

maiñ ne us se kahā ye aañsū haiñ
us ne mujh se kahā ye paanī hai

taaza taaza hai terā ġham 'imrran'
ye kahānī baḌī purānī hai

ek to sar-phirī havā kī chaal
aur kashtī bhī bādbānī hai

zaḳhm jis vaqt kī amānat thā
dard us daur kī nishānī hai

sher jis ko samajh rahe haiñ janāb
ye haqīqat meñ be-zabānī hai

phir vahī hai savāl-e-kaun-o-makāñ
phir vahī merī be-makānī hai

ai ḳhudā ye vajūd kā jhagḌā
ḳhaak kā hai ki āsmānī hai

zindagi mein jo ye rawani hai
ek kirdar ki kahani hai

main ne us se kaha ye aansu hain
us ne mujh se kaha ye pani hai

taza taza hai tera gham 'imrran'
ye kahani baDi purani hai

ek to sar-phiri hawa ki chaal
aur kashti bhi baadbani hai

zaKHm jis waqt ki amanat tha
dard us daur ki nishani hai

sher jis ko samajh rahe hain janab
ye haqiqat mein be-zabani hai

phir wahi hai sawal-e-kaun-o-makan
phir wahi meri be-makani hai

ai KHuda ye wajud ka jhagDa
KHak ka hai ki aasmani hai