gar chāhte ho farsh se aflāk pe rakkho
ik baar mujhe phir se zarā chaak pe rakkho

ik barf kī sil qalb-e-pareshāñ pe utāro
ik dasht mire dīda-e-namnāk pe rakkho

tum ramz-e-shahādat ke ma.ānī nahīñ samjhe
sar nok kī sidra pe badan ḳhaak pe rakkho

lāzim hai ki chābuk se tarāsho mirā paikar
vājib hai ki tum tursh-ravī naak pe rakkho

phir pusht pe har ḳhvāb kī zanjīr-zanī ho
jab shām-e-ġharībāñ mirī poshāk pe rakkho

yuuñ qais ke rutbe kī ḳhabar honī hai 'rāhib'
sahrā ko agar shāna-e-idrāk pe rakkho

gar chahte ho farsh se aflak pe rakkho
ek bar mujhe phir se zara chaak pe rakkho

ek barf ki sil qalb-e-pareshan pe utaro
ek dasht mere dida-e-namnak pe rakkho

tum ramz-e-shahadat ke maani nahin samjhe
sar nok ki sidra pe badan KHak pe rakkho

lazim hai ki chabuk se tarasho mera paikar
wajib hai ki tum tursh-rawi nak pe rakkho

phir pusht pe har KHwab ki zanjir-zani ho
jab sham-e-ghariban meri poshak pe rakkho

yun qais ke rutbe ki KHabar honi hai 'rahib'
sahra ko agar shana-e-idrak pe rakkho