maiñ shajar huuñ aur ik pattā hai tū
merī hī to shāḳh se TuuTā hai tū

shā.erī meñ roz tūfāñ se laḌā
kyā samundar meñ kabhī utrā hai tū

sub.h tak sahmī rahīñ āñkheñ mirī
ḳhvāb kaisī raah se guzrā hai tū

kyā ḳhabar kab saath merā chhoḌ de
āñkhoñ meñ Thahrā huā qatra hai tū

kuchh kamī shāyad tirī miTTī meñ hai
jab sameTā dil tujhe bikhrā hai tū

vaqt-e-ruḳhsat tū burā mat kah ise
umr bhar is jism meñ Thahrā hai tū

buz-dilī keval mire andar hai kyā
yuuñ mujhe hairat se kyuuñ taktā hai tū

ye tirī sāzish hai yā phir ittifāq
maiñ jahāñ Duubā vahīñ ubhrā hai tū

jo añdhere meñ kahīñ gum ho gayā
sochtā huuñ kyā vahī saaya hai tū

kyā ḳhabar muḳhbir havā kā ho vahī
ai diye jis ke liye jaltā hai tū

zindagī ne phir tujhe uljhā liyā
maiñ na kahtā thā abhī bachcha hai tū

main shajar hun aur ek patta hai tu
meri hi to shaKH se TuTa hai tu

shaeri mein roz tufan se laDa
kya samundar mein kabhi utra hai tu

subh tak sahmi rahin aankhen meri
KHwab kaisi rah se guzra hai tu

kya KHabar kab sath mera chhoD de
aankhon mein Thahra hua qatra hai tu

kuchh kami shayad teri miTTi mein hai
jab sameTa dil tujhe bikhra hai tu

waqt-e-ruKHsat tu bura mat kah ise
umr bhar is jism mein Thahra hai tu

buz-dili kewal mere andar hai kya
yun mujhe hairat se kyun takta hai tu

ye teri sazish hai ya phir ittifaq
main jahan Duba wahin ubhra hai tu

jo andhere mein kahin gum ho gaya
sochta hun kya wahi saya hai tu

kya KHabar muKHbir hawa ka ho wahi
ai diye jis ke liye jalta hai tu

zindagi ne phir tujhe uljha liya
main na kahta tha abhi bachcha hai tu