āsmāñ mil na sakā dhartī pe aayā na gayā
zindagī ham se koī Thaur banāyā na gayā

ās.māñ mujh se miyāñ hujre meñ laayā na gayā
shā.irī chhoḌ dī mafhūm churāyā na gayā

naukrī kii, likhī nazmeñ, sukūñ paayā na gayā
shahr-e-dil tujh ko kisī taur basāyā na gayā

ghar kī vīrāniyāñ rusvā huiiñ bekār meñ hī
mujh se bāzār meñ bhī vaqt bitāyā na gayā

josh meñ Dhā to dī rishte kī imārat lekin
donoñ se aaj talak malba haTāyā na gayā

ḳhuun ke daaġh na aa jaa.eñ mire lahje meñ
is liye ġhazloñ ko aḳhbār banāyā na gayā

dikh na jaa.e tū bichhaḌtī huī bas is Dar se
mujh se āñkhoñ ko koī ḳhvāb dikhāyā na gayā

apnā hissa bhī to māñgā hai zamīñ se maiñ ne
ās.māñ yuuñ hī mire sar pe girāyā na gayā

jo tirī yaad ke panchhī na ruke kyā hai ajab
umr bhar dil meñ to tujh ko bhī biThāyā na gayā

zaat maz.hab ki zabāñ naam usī ke to haiñ sab
ḳhud ko jis qaid se tā-umr chhuḌāyā na gayā

ḳhaak dariyā ke kināroñ ko milā.ūñgā maiñ
ḳhud ko hī aaj talak ḳhud se milāyā na gayā

merā īmān huā ḳharch jise paane meñ
kyā ġhazab hogā jo us shai ko bachāyā na gayā

aasman mil na saka dharti pe aaya na gaya
zindagi hum se koi Thaur banaya na gaya

aasman mujh se miyan hujre mein laya na gaya
shairi chhoD di mafhum churaya na gaya

naukri ki, likhi nazmen, sukun paya na gaya
shahr-e-dil tujh ko kisi taur basaya na gaya

ghar ki viraniyan ruswa huin bekar mein hi
mujh se bazar mein bhi waqt bitaya na gaya

josh mein Dha to di rishte ki imarat lekin
donon se aaj talak malba haTaya na gaya

KHun ke dagh na aa jaen mere lahje mein
is liye ghazlon ko aKHbar banaya na gaya

dikh na jae tu bichhaDti hui bas is Dar se
mujh se aankhon ko koi KHwab dikhaya na gaya

apna hissa bhi to manga hai zamin se main ne
aasman yun hi mere sar pe giraya na gaya

jo teri yaad ke panchhi na ruke kya hai ajab
umr bhar dil mein to tujh ko bhi biThaya na gaya

zat mazhab ki zaban nam usi ke to hain sab
KHud ko jis qaid se ta-umr chhuDaya na gaya

KHak dariya ke kinaron ko milaunga main
KHud ko hi aaj talak KHud se milaya na gaya

mera iman hua KHarch jise pane mein
kya ghazab hoga jo us shai ko bachaya na gaya