maiñ sach kahūñ pas-e-dīvār jhuuT bolte haiñ
mire ḳhilāf mire yaar jhuuT bolte haiñ

milī hai jab se unheñ bolne kī āzādī
tamām shahr ke aḳhbār jhuuT bolte haiñ

maiñ mar chukā huuñ mujhe kyuuñ yaqīñ nahīñ aatā
to kyā ye mere azā-dār jhuuT bolte haiñ

ye shahr-e-ishq bahut jald ujaḌne vaalā hai
dukān-dār o ḳharīdār jhuuT bolte haiñ

batā rahī hai ye taqrīb-e-mimbar-o-mehrāb
ki muttaqī o riyā-kār jhuuT bolte haiñ

qadam qadam pe na.ī dāstāñ sunāte log
qadam qadam pe ka.ī baar jhuuT bolte haiñ

maiñ sochtā huuñ ki dam leñ to maiñ unheñ Tokūñ
magar ye log lagātār jhuuT bolte haiñ

hamāre shahr meñ 'āmī' munāfiqat hai bahut
makīn kyā dar-o-dīvār jhuuT bolte haiñ

main sach kahun pas-e-diwar jhuT bolte hain
mere KHilaf mere yar jhuT bolte hain

mili hai jab se unhen bolne ki aazadi
tamam shahr ke aKHbar jhuT bolte hain

main mar chuka hun mujhe kyun yaqin nahin aata
to kya ye mere aza-dar jhuT bolte hain

ye shahr-e-ishq bahut jald ujaDne wala hai
dukan-dar o KHaridar jhuT bolte hain

bata rahi hai ye taqrib-e-mimbar-o-mehrab
ki muttaqi o riya-kar jhuT bolte hain

qadam qadam pe nai dastan sunate log
qadam qadam pe kai bar jhuT bolte hain

main sochta hun ki dam len to main unhen Tokun
magar ye log lagatar jhuT bolte hain

hamare shahr mein 'ami' munafiqat hai bahut
makin kya dar-o-diwar jhuT bolte hain