kab ġhair huā mahv tirī jalvagarī kā
tū pūchh mire dil se maza be-ḳhabarī kā

saudā jo gul-o-lāla ko hai jeb-darī kā
adnā ye shagūfa hai nasīm-e-saharī kā

kis ne lab-e-bām aa ke dikhāyā ruḳh-e-raushan
ḳhurshīd meñ hai rañg charāġh-e-saharī kā

apnī ye ġhazal hai ki paristān-e-suḳhan hai
parvāz-e-mazāmīñ meñ hai andāz parī kā

kuchh kam nahīñ nāzuk mire mazmūn-e-kamar se
shohra hai bajā yaar kī nāzuk-kamarī kā

ik raat bhī ai maah na jaagī mirī qismat
suntā thā bahut shor duā-e-saharī kā

jis ne mujhe āgāh kiyā hāl-e-jahāñ se
kyā lutf jamādāt ko hai be-ḳhabarī kā

ġhurbat meñ milā lutf kahīñ baḌh ke vatan se
hāsil jo huā tujh se mazā ham-safarī kā

us maah kī mahfil meñ jo hai qahqaha-zan aaj
hotā hai bat-e-mai pe gumāñ kabk-e-darī kā

qur.ān kahe detā hai ki ham haq kī zabāñ haiñ
hotā hai judā taur kalām-e-bashrī kā

aadam kī to maañ bhī na thī ai munkir-e-e.ajāz
iisā ko milā sirf sharaf be-pidrī kā

sarv-e-qad-e-dilbar kī jo tasvīr hai dil par
ham-sañg nahīñ la.al-e-aqīq-e-shajarī kā

āñkheñ haiñ hasīnoñ kī tire sabza-e-ruḳh par
kyūñki na ho mailān ġhazāloñ ko charī kā

chal tū bhī 'asar' le ke matā-e-dil-e-betāb
vo dekhne jaate haiñ tamāshā guzarī kā

kab ghair hua mahw teri jalwagari ka
tu puchh mere dil se maza be-KHabari ka

sauda jo gul-o-lala ko hai jeb-dari ka
adna ye shagufa hai nasim-e-sahari ka

kis ne lab-e-baam aa ke dikhaya ruKH-e-raushan
KHurshid mein hai rang charagh-e-sahari ka

apni ye ghazal hai ki paristan-e-suKHan hai
parwaz-e-mazamin mein hai andaz pari ka

kuchh kam nahin nazuk mere mazmun-e-kamar se
shohra hai baja yar ki nazuk-kamari ka

ek raat bhi ai mah na jagi meri qismat
sunta tha bahut shor dua-e-sahari ka

jis ne mujhe aagah kiya haal-e-jahan se
kya lutf jamadat ko hai be-KHabari ka

ghurbat mein mila lutf kahin baDh ke watan se
hasil jo hua tujh se maza ham-safari ka

us mah ki mahfil mein jo hai qahqaha-zan aaj
hota hai bat-e-mai pe guman kabk-e-dari ka

quran kahe deta hai ki hum haq ki zaban hain
hota hai juda taur kalam-e-bashri ka

aadam ki to man bhi na thi ai munkir-e-eajaz
isa ko mila sirf sharaf be-pidri ka

sarw-e-qad-e-dilbar ki jo taswir hai dil par
ham-sang nahin lal-e-aqiq-e-shajari ka

aankhen hain hasinon ki tere sabza-e-ruKH par
kyunki na ho mailan ghazalon ko chari ka

chal tu bhi 'asar' le ke mata-e-dil-e-betab
wo dekhne jate hain tamasha guzari ka