apnī jāñ-bāzī kā jis dam imtihāñ ho jā.egā
ḳhanjar-e-saffāk par jauhar ayaañ ho jā.egā

āh-e-sozāñ kā agar ūñchā dhuāñ ho jā.egā
āsmāñ ik aur zer-e-āsmāñ ho jā.egā

kuchh samajh kar us mah-e-ḳhūbī se kī thī dostī
ye na samjhe the ki dushman āsmāñ ho jā.egā

le ḳhabar bīmār-e-ġham kī varna ai rashk-e-masīh
terī furqat meñ firāq-e-jism-o-jāñ ho jā.egā

ḳhaak kar degā mujhe āḳhir siyah-chashmoñ kā ishq
jism-e-ḳhākī gard-e-pā-e-āhu.vāñ ho jā.egā

jab adā se vo karegā qatl mujh ko ai 'asar'
kushta-e-shamshīr-e-hairat ik jahāñ ho jā.egā

apni jaan-bazi ka jis dam imtihan ho jaega
KHanjar-e-saffak par jauhar ayan ho jaega

aah-e-sozan ka agar uncha dhuan ho jaega
aasman ek aur zer-e-asman ho jaega

kuchh samajh kar us mah-e-KHubi se ki thi dosti
ye na samjhe the ki dushman aasman ho jaega

le KHabar bimar-e-gham ki warna ai rashk-e-masih
teri furqat mein firaq-e-jism-o-jaan ho jaega

KHak kar dega mujhe aaKHir siyah-chashmon ka ishq
jism-e-KHaki gard-e-pa-e-ahuwan ho jaega

jab ada se wo karega qatl mujh ko ai 'asar'
kushta-e-shamshir-e-hairat ek jahan ho jaega