dil se kyā pūchhtā hai zulf-e-girah-gīr se pūchh
apne dīvāne kā ahvāl tū zanjīr se pūchh

merī jāñ-bāzī ke jauhar nahīñ raushan tujh par
kuchh khule haiñ tirī shamshīr pe shamshīr se pūchh

pursish-e-hāl ko jaatī hai kahāñ ai lailā
qais kī shakl hai kyā qais kī tasvīr se pūchh

vāqif-e-rāz nahīñ pīr-e-muġhāñ sā koī
hai dilā pūchhnā jo kuchh tujhe us piir se pūchh

vāqif-e-lazzat-e-āzār nahīñ har koī
kyā mazā ġham meñ hai ye āshiq-e-dil-gīr se pūchh

garmī-e-shauq nahīñ hai to dahan meñ ai sham.a
kis liye terī zabāñ letā hai gul-gīr se pūchh

ulTī kyuuñ paḌtī hai tadbīr ye ham kyā jāneñ
kaun ulaT detā hai is raaz ko tadbīr se pūchh

mujh se ai dāvar-e-mahshar hai ye pursish kaisī
pūchhnā hai tujhe jo kuchh mirī taqdīr se pūchh

yuuñ to ustād-e-fan-e-sher bahut se guzre
kis ko kahte haiñ ġhazal-goī 'asar' 'mīr' se pūchh

dil se kya puchhta hai zulf-e-girah-gir se puchh
apne diwane ka ahwal tu zanjir se puchh

meri jaan-bazi ke jauhar nahin raushan tujh par
kuchh khule hain teri shamshir pe shamshir se puchh

pursish-e-haal ko jati hai kahan ai laila
qais ki shakl hai kya qais ki taswir se puchh

waqif-e-raaz nahin pir-e-mughan sa koi
hai dila puchhna jo kuchh tujhe us pir se puchh

waqif-e-lazzat-e-azar nahin har koi
kya maza gham mein hai ye aashiq-e-dil-gir se puchh

garmi-e-shauq nahin hai to dahan mein ai shama
kis liye teri zaban leta hai gul-gir se puchh

ulTi kyun paDti hai tadbir ye hum kya jaanen
kaun ulaT deta hai is raaz ko tadbir se puchh

mujh se ai dawar-e-mahshar hai ye pursish kaisi
puchhna hai tujhe jo kuchh meri taqdir se puchh

yun to ustad-e-fan-e-sher bahut se guzre
kis ko kahte hain ghazal-goi 'asar' 'mir' se puchh