suulī chaḌhe jo yaar ke qad par fidā na ho
phāñsī chaḌhe jo qaidī-e-zulf-e-rasā na ho

mazmūñ vo kyā jo lazzat-e-ġham se bharā na ho
shā.er vo kyā kalām meñ jis ke mazā na ho

bad-nām mere vāste vo dilrubā na ho
yā-rab adū ke haath se merī qazā na ho

jab apnī koī baat baġhair-az-duā na ho
dushman ke kahne sunñe se nādāñ ḳhafā na ho

ho vo agar ḳhilāf-e-muāfiq havā na ho
Duube vo naav jis kā ḳhudā nāḳhudā na ho

dil-dādgī ko husn-e-ḳhudā-dād kam nahīñ
nāseh agar nahīñ hai butoñ meñ vafā na ho

roz-e-jazā vo shoḳh mile ham ko ai ḳhudā
is ke sivā kuchh aur adū kī sazā na ho

mushkil kā sāmnā ho to himmat na hāriye
himmat hai shart sāhib-e-himmat se kyā na ho

but āzarān-e-vaqt banā.eñ agar hazār
terā nazīr ek bhī naam ḳhudā na ho

dhoke meñ mere qatl kyā us ne ġhair ko
qātil kā kyā qusūr jo merī qazā na ho

sach hai ki har kamāl ko duniyā meñ hai zavāl
aisā baḌā hai kaun jo āḳhir ghaTā na ho

roz-e-jazā se vā.iz-e-nādān use Darā
sadma shab-e-firāq kā jis ne sahā na ho

miltā nahīñ patā tire chhalle ke chor kā
ai gul-badan ye shoḳhī-e-duzd-e-hinā na ho

terā gila na ġhair kā shikva zabāñ pe hai
kartā huuñ arz hāl-e-sitamgar ḳhafā na ho

paate haiñ kaj-sarisht jazā apne fe.al kī
kahtī hai rāstī ki bure kā bhalā na ho

bulbul na phuul ḳhanda-e-sub.h-e-bahār par
nādāñ kahīñ ye ḳhanda-e-dandāñ-numā na ho

terī zabāñ pe aa.e agar harf-e-iltiyām
kyuuñ kar shikast-e-dil ke liye momyā na ho

ġhāfil marīz-e-ishq kī tū ne ḳhabar na lī
thā ġhair us kā haal vo ab tak ho yā na ho

sharminda ai karīm na hoñ āshiqoñ meñ ham
pursish hamāre qatl kī roz-e-jazā na ho

kartā hai ai 'asar' dil-e-ḳhūñ-gashta kā gila
āshiq vo kyā ki ḳhasta-e-teġh-e-jafā na ho

suli chaDhe jo yar ke qad par fida na ho
phansi chaDhe jo qaidi-e-zulf-e-rasa na ho

mazmun wo kya jo lazzat-e-gham se bhara na ho
shaer wo kya kalam mein jis ke maza na ho

bad-nam mere waste wo dilruba na ho
ya-rab adu ke hath se meri qaza na ho

jab apni koi baat baghair-az-dua na ho
dushman ke kahne sunne se nadan KHafa na ho

ho wo agar KHilaf-e-muafiq hawa na ho
Dube wo naw jis ka KHuda naKHuda na ho

dil-dadgi ko husn-e-KHuda-dad kam nahin
naseh agar nahin hai buton mein wafa na ho

roz-e-jaza wo shoKH mile hum ko ai KHuda
is ke siwa kuchh aur adu ki saza na ho

mushkil ka samna ho to himmat na haariye
himmat hai shart sahib-e-himmat se kya na ho

but aazaran-e-waqt banaen agar hazar
tera nazir ek bhi nam KHuda na ho

dhoke mein mere qatl kya us ne ghair ko
qatil ka kya qusur jo meri qaza na ho

sach hai ki har kamal ko duniya mein hai zawal
aisa baDa hai kaun jo aaKHir ghaTa na ho

roz-e-jaza se waiz-e-nadan use Dara
sadma shab-e-firaq ka jis ne saha na ho

milta nahin pata tere chhalle ke chor ka
ai gul-badan ye shoKHi-e-duzd-e-hina na ho

tera gila na ghair ka shikwa zaban pe hai
karta hun arz haal-e-sitamgar KHafa na ho

pate hain kaj-sarisht jaza apne feal ki
kahti hai rasti ki bure ka bhala na ho

bulbul na phul KHanda-e-subh-e-bahaar par
nadan kahin ye KHanda-e-dandan-numa na ho

teri zaban pe aae agar harf-e-iltiyam
kyun kar shikast-e-dil ke liye momya na ho

ghafil mariz-e-ishq ki tu ne KHabar na li
tha ghair us ka haal wo ab tak ho ya na ho

sharminda ai karim na hon aashiqon mein hum
pursish hamare qatl ki roz-e-jaza na ho

karta hai ai 'asar' dil-e-KHun-gashta ka gila
aashiq wo kya ki KHasta-e-tegh-e-jafa na ho