ātish-e-bāġh aisī bhaḌkī hai ki jaltī hai havā
kūcha-e-gul se dhuāñ ho kar nikaltī hai havā

girya-e-ushshāq se kīchaḌ hai aise jā-ba-jā
thaam kar dīvār-o-dar galiyoñ meñ chaltī hai havā

gulshan-e-ālam kī nairañgī se hotā hai yaqīñ
phir shagūfa phūltā hai phir badaltī hai havā

dekhiye jā kar zarā kaifiyyat-e-josh-e-bahār
jhūmte haiñ peḌ gir gir kar sambhaltī hai havā

nā-rasā.ī dekhnā uḌtā hai jab merā ġhubār
yaar ke koThe kī kānis se phisaltī hai havā

garmiyoñ meñ sair gulzāroñ kī bhātī hai mujhe
har qadam par pañkhiyā phūloñ kī jhaltī hai havā

'bahr' pañkhā haath se rakh do nihāyat zaar huuñ
mauj-e-dariyā kī tarah mujh ko kuchaltī hai havā

aatish-e-bagh aisi bhaDki hai ki jalti hai hawa
kucha-e-gul se dhuan ho kar nikalti hai hawa

girya-e-ushshaq se kichaD hai aise ja-ba-ja
tham kar diwar-o-dar galiyon mein chalti hai hawa

gulshan-e-alam ki nairangi se hota hai yaqin
phir shagufa phulta hai phir badalti hai hawa

dekhiye ja kar zara kaifiyyat-e-josh-e-bahaar
jhumte hain peD gir gir kar sambhalti hai hawa

na-rasai dekhna uDta hai jab mera ghubar
yar ke koThe ki kanis se phisalti hai hawa

garmiyon mein sair gulzaron ki bhati hai mujhe
har qadam par pankhiya phulon ki jhalti hai hawa

'bahr' pankha hath se rakh do nihayat zar hun
mauj-e-dariya ki tarah mujh ko kuchalti hai hawa