mahram ke sitāre TūTte haiñ
pistān ke anaar chhūTte haiñ

dil par hai vo sadma-e-judā.ī
ghaḌiyāl bhī siina kūTte haiñ

koī to matā-e-dil ko pūchhe
ābād raheñ jā lūTte haiñ

āñkhoñ ko bahā.egā ye ronā
dariyā meñ charāġh chhūTte haiñ

tai kis se ho vādī-e-mohabbat
chalte hue paañv TūTte haiñ

kis ke gāloñ se hamsarī kiye
sone ke varaq ko kūTte haiñ

ye dil use muft bhī hai mahñgā
ham ḳhush haiñ kī saste chhūTte haiñ

rindoñ ne diyā jo saana apnā
saaqī kī dukān lūTte haiñ

kiyā shikoh-e-sañg ko dukān-e-'bahr'
ham par to pahāḌ TūTte haiñ

mahram ke sitare TuTte hain
pistan ke anar chhuTte hain

dil par hai wo sadma-e-judai
ghaDiyal bhi sina kuTte hain

koi to mata-e-dil ko puchhe
aabaad rahen ja luTte hain

aankhon ko bahaega ye rona
dariya mein charagh chhuTte hain

tai kis se ho wadi-e-mohabbat
chalte hue panw TuTte hain

kis ke galon se hamsari kiye
sone ke waraq ko kuTte hain

ye dil use muft bhi hai mahnga
hum KHush hain ki saste chhuTte hain

rindon ne diya jo sana apna
saqi ki dukan luTte hain

kiya shikoh-e-sang ko dukan-e-'bahr'
hum par to pahaD TuTte hain