aise pur-nūr-o-ziyā yaar ke ruḳhsāre haiñ
jin ke aage mah-o-ḳhurshīd bhī do taare haiñ

koī in āñkhoñ se is sabza-e-ḳhat ko pūchhe
ye vo kāñTe haiñ ki palkoñ se sivā pyāre haiñ

koī sabqat na kabhī ḳhaal se jitne ho bacho
saañp gesū-e-siyah-fām se man haare haiñ

kyuuñ kar añgiyā meñ na ho sūrat-e-jauzā paidā
gore gore tire pistāñ haiñ ki mah-pāre haiñ

fasl-e-gul aa.e kalī koī na koī chaTke
aaj murġhān-e-sahar baaġh meñ chahkāre haiñ

ishq-e-atfāl-e-chaman meñ haiñ anādil betāb
āshiyānoñ kā ye aalam hai ki gahvāre haiñ

qatl kartā hai mujhe kyuuñ shab-e-furqat ḳhāmosh
ai mo.azzin mad-e-takbīr nahīñ aare haiñ

ek din parcha lagā.eñge nakīrain zarūr
ye farishte nahīñ aḳhbār ke harkāre haiñ

ḳhāl-e-mushkīñ ne dil aisā hī jalāyā hai ki bas
ko.eloñ par bhī ye dhokā hai ki añgāre haiñ

ḳhvān-e-ne.amat se kabhī ḳhat na uThā.eñge baḳhīl
maal khā saktī haiñ taqdīr ne muñh maare haiñ

na sazā-vār-e-hazar huuñ na mubārak hai safar
mere palle pe na sābit haiñ na sayyāre haiñ

rañg gulzār kā shabnam sā uḌā jaatā hai
rū-ba-rū tere hazārī nahīñ favvāre haiñ

vaah kyā yaar ke hoñToñ kī maiñ tārīf karūñ
jaan shīrīñ nahīñ jin se vo shakar-pāre haiñ

ḳhāna-e-ishq ke mehmāñ haiñ ham aur tadūr
daaġh haiñ ham ko nasīb aur use añgāre haiñ

'bahr' ayyām-e-judā.ī meñ na kapḌe phāḌo
ye samajh lo ki shab-e-vasl ke kaffāre haiñ

aise pur-nur-o-ziya yar ke ruKHsare hain
jin ke aage mah-o-KHurshid bhi do tare hain

koi in aankhon se is sabza-e-KHat ko puchhe
ye wo kanTe hain ki palkon se siwa pyare hain

koi sabqat na kabhi KHal se jitne ho bacho
sanp gesu-e-siyah-fam se man haare hain

kyun kar angiya mein na ho surat-e-jauza paida
gore gore tere pistan hain ki mah-pare hain

fasl-e-gul aae kali koi na koi chaTke
aaj murghan-e-sahar bagh mein chahkare hain

ishq-e-atfal-e-chaman mein hain anadil betab
aashiyanon ka ye aalam hai ki gahware hain

qatl karta hai mujhe kyun shab-e-furqat KHamosh
ai moazzin mad-e-takbir nahin aare hain

ek din parcha lagaenge nakirain zarur
ye farishte nahin aKHbar ke harkare hain

KHal-e-mushkin ne dil aisa hi jalaya hai ki bas
koelon par bhi ye dhoka hai ki angare hain

KHwan-e-neamat se kabhi KHat na uThaenge baKHil
mal kha sakti hain taqdir ne munh mare hain

na saza-war-e-hazar hun na mubarak hai safar
mere palle pe na sabit hain na sayyare hain

rang gulzar ka shabnam sa uDa jata hai
ru-ba-ru tere hazari nahin fawware hain

wah kya yar ke honTon ki main tarif karun
jaan shirin nahin jin se wo shakar-pare hain

KHana-e-ishq ke mehman hain hum aur tadur
dagh hain hum ko nasib aur use angare hain

'bahr' ayyam-e-judai mein na kapDe phaDo
ye samajh lo ki shab-e-wasl ke kaffare hain