ye jism zaar hai yuuñ pairahan ke parde meñ
ki jaise ruuh nihāñ hai badan ke parde meñ

sivā.e ahl-e-suḳhan ho mushāhida kis ko
nihāñ hai shāhid-e-ma.anī suḳhan ke parde meñ

talāsh jis kī hai din-rāt tujh ko ai ġhāfil
chhupā huā hai vo tere hī tan ke parde meñ

jo andalīb kī āñkhoñ se dekhe vo samjhe
zuhūr hai usī gul kā chaman ke parde meñ

shab-e-siyāh judā.ī meñ raushnī ho kahīñ
lagā.ūñ aag maiñ bait-ul-huzan ke parde meñ

tarīq-e-ishq chhuḌāyā hai tū ne ġhārat-gar
milā hai ḳhizr mujhe rāhzan ke parde meñ

latāfat aisī hai tujh meñ ki dekhtā huuñ saaf
guhar se daañt haiñ durj-e-dahan ke parde meñ

ba-rañg-e-zar koī kapḌoñ meñ aag rahtī hai
na mere daaġh chhupeñge kafan ke parde meñ

naqāb se tire abrū jo salḳh ko khul jaa.eñ
tū māh-e-nūr hai charḳh-e-kuhan ke parde meñ

agar tum aa.e the shīrīñ ke bhes meñ sāhab
to saath banda bhī thā kohkan ke parde meñ

numūd ho na tire ḳhatt-e-ambar-e-afshāñ kī
rahe vo jild ezār-o-zaqan ke parde meñ

chaman meñ laa.ī sabā kis kī bū jo aaj shamīm
damak rahī hai gul-e-yāsman ke parde meñ

nazar se thā sharar-e-sañg kī tarah jo nihāñ
vo but milā mujhe ik but-shikan ke parde meñ

tumhāre rū-e-muḳhattat kā muñh chiḌhāte haiñ
ye mehr-o-māh parī-rū gahan ke parde meñ

hazāroñ paḌ ga.e tīr-e-nigāh se sūrāḳh
hamāre is but-e-nāvak-fagan ke parde meñ

ḳhabar na shām-e-ġharībī kī mujh ko thī 'nāsiḳh'
chhupī huī thī ye sub.h-e-vatan ke parde meñ

ye jism zar hai yun pairahan ke parde mein
ki jaise ruh nihan hai badan ke parde mein

siwae ahl-e-suKHan ho mushahida kis ko
nihan hai shahid-e-mani suKHan ke parde mein

talash jis ki hai din-raat tujh ko ai ghafil
chhupa hua hai wo tere hi tan ke parde mein

jo andalib ki aankhon se dekhe wo samjhe
zuhur hai usi gul ka chaman ke parde mein

shab-e-siyah judai mein raushni ho kahin
lagaun aag main bait-ul-huzan ke parde mein

tariq-e-ishq chhuDaya hai tu ne ghaarat-gar
mila hai KHizr mujhe rahzan ke parde mein

latafat aisi hai tujh mein ki dekhta hun saf
guhar se dant hain durj-e-dahan ke parde mein

ba-rang-e-zar koi kapDon mein aag rahti hai
na mere dagh chhupenge kafan ke parde mein

naqab se tere abru jo salKH ko khul jaen
tu mah-e-nur hai charKH-e-kuhan ke parde mein

agar tum aae the shirin ke bhes mein sahab
to sath banda bhi tha kohkan ke parde mein

numud ho na tere KHatt-e-ambar-e-afshan ki
rahe wo jild ezar-o-zaqan ke parde mein

chaman mein lai saba kis ki bu jo aaj shamim
damak rahi hai gul-e-yasman ke parde mein

nazar se tha sharar-e-sang ki tarah jo nihan
wo but mila mujhe ek but-shikan ke parde mein

tumhaare ru-e-muKHattat ka munh chiDhate hain
ye mehr-o-mah pari-ru gahan ke parde mein

hazaron paD gae tir-e-nigah se suraKH
hamare is but-e-nawak-fagan ke parde mein

KHabar na sham-e-gharibi ki mujh ko thi 'nasiKH'
chhupi hui thi ye subh-e-watan ke parde mein