zor hai garmi-e-bāzār tire kūche meñ
jam.a haiñ tere ḳharīdār tire kūche meñ

dekh kar tujh ko qadam uTh nahīñ saktā apnā
ban ga.e sūrat-e-dīvār tire kūche meñ

paañv phailā.e zamīñ par maiñ paḌā rahtā huuñ
sūrat-e-sāya-e-dīvār tire kūche meñ

go tū miltā nahīñ par dil ke taqāze se ham
roz ho aate haiñ sau baar tire kūche meñ

ek ham haiñ ki qadam rakh nahīñ sakte varnā
aiñDate phirte haiñ aġhyār tire kūche meñ

pāsbānoñ kī tarah rātoñ ko be-tābī se
naale karte haiñ ham ai yaar tire kūche meñ

aarzū hai jo marūñ maiñ to yahīñ dafn bhī huuñ
hai jagah thoḌī sī darkār tire kūche meñ

gar yahī haiñ tire abrū ke ishāre qātil
āj-kal chaltī hai talvār tire kūche meñ

hāl-e-dil kahne kā 'nāsiḳh' jo nahīñ paatā baar
pheñk jaatā hai vo ash.ār tire kūche meñ

zor hai garmi-e-bazar tere kuche mein
jama hain tere KHaridar tere kuche mein

dekh kar tujh ko qadam uTh nahin sakta apna
ban gae surat-e-diwar tere kuche mein

panw phailae zamin par main paDa rahta hun
surat-e-saya-e-diwar tere kuche mein

go tu milta nahin par dil ke taqaze se hum
roz ho aate hain sau bar tere kuche mein

ek hum hain ki qadam rakh nahin sakte warna
ainDate phirte hain aghyar tere kuche mein

pasbanon ki tarah raaton ko be-tabi se
nale karte hain hum ai yar tere kuche mein

aarzu hai jo marun main to yahin dafn bhi hun
hai jagah thoDi si darkar tere kuche mein

gar yahi hain tere abru ke ishaare qatil
aaj-kal chalti hai talwar tere kuche mein

haal-e-dil kahne ka 'nasiKH' jo nahin pata bar
phenk jata hai wo ashaar tere kuche mein

RECITATIONS Fasih Akmal



00:00/00:00 zor hai garmi-e-bazar tere kuche mein Fasih Akmal