ye ahd kyā hai ki sab par girāñ guzartā hai
ye kyā tilism hai kyā imtihāñ guzartā hai

vo qaht-e-lutf hai har-dam tire faqīroñ par
hazār vasvasa ātish-ba-jāñ guzartā hai

jo ḳhaak ho ga.e tere firāq meñ un kā
ḳhayāl bhī kabhī ai jān-e-jāñ guzartā hai

jab us kī bazm se chal hī paḌe to sochnā kyā
ki arsa-e-ġham-e-hijrāñ kahāñ guzartā hai

kabhī vo chehra-e-mānūs bhī dikhā.ī de
galī se roz nayā kārvāñ guzartā hai

'zafar' basant bhī hai aur bahār kī rut bhī
falak pe taḳhta-e-gul kā gumāñ guzartā hai

ye ahd kya hai ki sab par giran guzarta hai
ye kya tilism hai kya imtihan guzarta hai

wo qaht-e-lutf hai har-dam tere faqiron par
hazar waswasa aatish-ba-jaan guzarta hai

jo KHak ho gae tere firaq mein un ka
KHayal bhi kabhi ai jaan-e-jaan guzarta hai

jab us ki bazm se chal hi paDe to sochna kya
ki arsa-e-gham-e-hijran kahan guzarta hai

kabhi wo chehra-e-manus bhi dikhai de
gali se roz naya karwan guzarta hai

'zafar' basant bhi hai aur bahaar ki rut bhi
falak pe taKHta-e-gul ka guman guzarta hai